Ամերիկացիների ավելի քան կեսը Հյուսիսային Կորեան համարում է ԱՄՆ-ի համար գլխավոր սպառնալիք, Ռուսաստանը սպառնալիքների ցուցակում երրորդ տեղում է։ Այս մասին են վկայում CBC հեռուստաալիքի և SurveyMonkey ընկերության հարցման տվյալները։
Համաձայն հետազոտության՝ ԱՄՆ բնակիչների 54 տոկոսը ի դեմս Հյուսիսային Կորեայի տեսնում է ավելի մեծ սպառնալիք, քան ի դեմս ԴԱԻՇ-ի, Չինաստանի, Իրանի և Ռուսաստանի։
Ցուցանիշները Դեմոկրատական և Հանրապետական կուսակցությունների կողմնակիցների շրջանում գրեթե չեն տարբերվում։ Հյուսիսային Կորեայում սպառնալիք է տեսնում դեմոկրատների 55 և հանրապետականների 53 տոկոսը։
Գլխավոր սպառնալիքների երկրորդ տեղում ԴԱԻՇ-ն է (19 տոկոս), երրորդում Ռուսաստանը (14 տոկոս)։
Այդ ցուցանիշները ցածր են հուլիսին անցկացված հարցման արդյունքներից, երբ Ռուսաստանում սպառնալիք է տեսել 18 տոկոսը, ԴԱԻՇ-ում՝ 28 տոկոսը։
Գլխավոր մարտահրավերների թվում ամերիկացիներն անվանել են նաև Չինաստանն ու Իրանը, նրանցից վախենում են համապատասխանաբար 6 և 4 տոկոսը։
Հարցվածների մեծամասնությունը՝ 64 տոկոսը, հայտարարել է, որ Վաշինգտոնի և Փխենյանի միջև խնդիրները լուծել պետք է դիվանագիտական ճանապարհով, 42 տոկոսն ընդգծել է, որ կտրականապես չի աջակցում Հյուսիսային Կորեայի հանդեպ ԱՄՆ նախագահ Դոնալդ Թրամփի քաղաքականությանը։
Հարցումն անցկացվել է հոկտեմբերի 13-17-ը, ավելի քան 5000 մեծահասակ ամերիկացիների շրջանում։
