1999թ. հոկտեմբերի 27-ին ՀՀ Ազգային ժողովի նիստերի դահլիճում ահաբեկչության գործով ցմահ ազատազրկման դատապարտված Էդուարդ Գրիգորյանը պատրաստվում է ամեն ինչ պատմել դեպքի մասին, փաստեր ու փաստաթղթեր հրապարակել։ Դրանից հետո Երևանի ավագանու «Ելք» խմբակցության անդամ, Հոկտեմբերի 27-ի զոհերից մեկի՝ Յուրի Բախշյանի կինը՝ Անահիտ Բախշյանը, դիմել է իրավաբաններին իրեն օգնելու և Հոկտեմբերի 27-ի գործը վերաբացելու համար: Բախշյանը նաև հայտարարել էր, որ պատրաստ է գնալ մինչև վերջ, միայն թե իր կողքին կանգնող լինի։
Հոկտեմբերի 27-ի գործով կարևորագույն վկաներից մեկի՝ Սամվել Առաքելյանի սպանությունը պատվիրելու և կատարելու համար 15 տարի անազատության դատապարտված Արթուր Այվազյանը՝ Մանախը, Էդուարդ Գրիգորյանի հայտարարությունները շոու է համարում՝ քաղաքական նպատակահարմարություններից ելնելով։
Արթուր Այվազյանի խոսքով՝ նույն Էդուարդ Գրիգորյանը և մյուսները բազմաթիվ այլ առիթներ են ունեցել՝ թեկուզ նախաքննության կամ դատաքննության փուլում, դրանից հետո, այդ փաստերը հրապարակելու, ճշմարտությունը պատմելու, բայց չեն արել։
«Էդուարդ Գրիգորյանի անձի վերաբերյալ ես չեմ ուզում դատողություններ անել։ Իմ կարծիքով՝ անձինք, ովքեր կատարել են այդ արարքը, պետք չէ դրա մասին խոսեն 20 տարի հետո, քաղաքական իրավիճակներից բխող ժամանակահատվածում։ Խոսել դրա մասին ժամանակ առ ժամանակ և ոչինչ չասել՝ ճիշտ չէ։ Սա ավելի շատ քաղաքական դիվիդենդներ շահելու, քաղաքական բուն գործընթացներից շեղելու բնույթ է կրում։ Ինչ-որ իրադարձությունների շուրջ խորհրդավորության շղարշ ստեղծելը դարձել է նոր քաղաքական գործելաոճ այս իշխանությունների համար, որը ինձ դուր չի գալիս։ Հոկտեմբերի 27-ը չափազանց լուրջ խնդիր է, որին մատների արանքով նայելը ընդունելի չէ»,- «Առաջին լրատվական»-ի հետ զրույցում ասաց Արթուր Այվազյանը։
Առավել մանրամասն՝ տեսանյութում: