Այսօր՝ մայիսի 27-ին, լրագրողների հետ զրույցում ՀՀ-ում Եվրամիության պատվիրակության ղեկավար Պյոտր Սվիտալսկին՝ պատասխանելով Հայաստանի Ազգային ժողովում մարդու իրավունքների հանձնաժողովը պետաիրավական հարցերի մշտական հանձնաժողովին միացնելու վերաբերյալ հարցին՝ նշեց. «Դուք հիշատակում եք Ազգային ժողովի ներքին հանձնաժողովներից մեկը, սրանք ԱԺ ինքնավար որոշումներն են, իշխող կոալիցիայի որոշումներն են: Մենք կխրախուսենք ԱԺ-ին մարդու իրավունքների հարցը ներառել իրենց օրակարգում»,- ասաց դեսպանը:
ԵՄ պատվիրակության ղեկավարը նշեց, որ նախորդ շաբաթ, երբ Եվրախորհրդարանի արտաքին գործերի հանձնաժողովը Երեւանում էր, Ազգային ժողովում հանդիպման ժամանակ ԵԽ պատգամավորները բարձրացրել են Հայաստանում մարդու իրավունքների մասին հարցերը, իսկ արտաքին գործերի հանձնաժողովի նախագահն էլ իր հերթին առաջարկներ ու կոչեր է արել ԱԺ նախագահին, փոխնախագահին եւ խմբակցությունների ղեկավարներին:
«Այս կոչերը մեծ մասամբ վերաբերում էին մարդու իրավունքների ոլորտներին, մասնավորապես ընտանեկան բռնության դեմ օրենքին, առանց խտրականության օրենքին եւ այլ օրենքների: Այսինքն, Եվրախորհրդարանի հանձնաժողովի այցի ժամանակ պարզ դարձան մի շարք առաջնահերթություններ, որոնք պետք է ներգրավվել ԱԺ օրակարգում: Մեզ համար կարևորն այն օրենքների ընդունումն է, որոնց հանձնառությունը Կառավարությունն ինքնուրույն է ստանձնել»,- ասաց Պյոտր Սվիտալսկին:
Անդրադառնալով դիտարկմանը, որ Հայաստանում ստեղծվող կոռուպցիայի կանխարգելման նոր մարմինը ձևական բնույթ է կրելու, քանի որ կազմը ընտրվելու է ԱԺ-ի կողմից, Սվիտալսկին նշեց. «ԵՄ-ն և անձամբ ես խրախուսում ենք այսպիսի մարմնի ստեղծումը: Հակակոռուպցիոն մարմինը արդյունավետ կլինի, եթե այն գործի անկախ է: Հայաստանում հակակոռուպցիոն մարմնի անկախության մասին կդատենք նրա գործողություններից»:
Մանրամասները՝ տեսանյութում: