Շանթ Հարությունյանի որդուն՝ Շահեն Հարությունյանին, ով հունիսին ամառային զորակոչի շրջանակներում զորակոչվելու է բանակ, զինկոմիսարիատից ուղարկել են հոգեբուժարան, որպեսզի բժշկական ստուգում անցնի:
«3 օր պետք է մնամ հոգեբուժարանում։ Փաստորեն դեռ սովետական կարգերը շարունակվում են։ Պապիկիս եղբորը՝ Մարզպետ Հարությունյանին, Սովետն է վեց ամիս պահել հոգեբուժարանում՝ այլախոհական գաղափարների և անկախական ձգտումների համար։ Հորս են երկու անգամ տարել հոգեբուժարան՝ քաղաքական հայացքների և ընդդիմադիր լինելու համար։ Հերթն ինձ էլ հասավ։
Հ.Գ. Թե՛ պապիկիս եղբոր, և թե՛ հորս նկատմամբ ինչքան էլ որ ճնշումներ են գործադրել, այնուամենայնիվ՝ ի վերջո գրել են, որ առողջ մարդիկ են։
Չեն հասկացել մինչև հիմա, որ մեր գենը առողջ է, ուղղակի իրենք են նույն տականք դավաճանները՝ առաջ սովետի տեսքով, հիմա էլ հայկական «սովետի» տեսքով։ Հիմք են ընդունել դատվածությունս ու որոշել են ուղարկել»,- ֆեյսբուքյան իր էջում գրել է Շահեն Հարությունյանը։
Շահեն Հարությունյանի մայրը՝ Ռուզաննա Բադալյանը, «Առաջին լրատվական»-ի հետ զրույցում ասաց, որ իր համար անհասկանալի է որդուն հոգեկան առողջության հետ կապված ստուգումը: Նրա խոսքով՝ Շահենը հոգեպես լիովին առողջ է և երբևէ որևէ խնդիր չի ունեցել:
«Զինկոմիսարիատն է Շահենին 3 օրով ուղարկել, որպեսզի նրա հոգեկան առողջության վիճակը ստուգեն: Դա պարտադիր ստուգում չէ, ոչ բոլորն են անցնում այդ ստուգումը, բայց Շահենին ուղեգիր են տվել, որ պետք է անցնի: Պարզապես ինձ համար հասկանալի չէ, թե որն է այդ ուղեգիր տալու հիմնավորումը, ինչից են վերցրել, որ Շահենը հոգեկան առողջության հետ կապված խնդիր ունի, ինչի վրա հիմնվելով են այդ ստուգումը նշանակել՝ պարզ չէ: Մեզ, Շահենին որևէ հիմնավորում չեն տրամադրել: Ուղղակի ուղեգիր են տվել»,- ասաց տիկին Ռուզաննան:
Նրա խոսքով՝ Շահենի քաղաքացիական ակտիվության ողջ ժամանակահատվածում երբևէ նման խնդիր չի առաջացել: «Եթե Շահենի դատվածությունն են պատճառ բռնում, ապա դա ինչ կապ ունի նրա հոգեկան առողջության հետ: Մեկը մյուսի հետ ոչ մի կապ չունի»,- նկատեց Շահենի մայրը՝ հավելելով. «Միանշանակ սա կապում եմ որդուս քաղաքացիական ակտիվության, նրա դիրքորոշման հետ: Այլ պատճառ չկա: Նա հիմա սովորում է համալսարանում, ոչ մի արտառոց վարքագիծ չի դրսևորել: Պարզապես գտել է իր ակտիվությունը դրսևորելու ձև: Իսկ եթե իրենք դա հոգեկան անհավասարակշռություն են համարում, դա արդեն իրենց խնդիրն է:
Շահենի վարքագծում չկա մի բան, որը հիմք տա կարծելու, թե նա հոգեկան առողջության հետ կապված խնդիր ունի»,- ասաց տիկին Ռուզաննան՝ ավելացնելով, որ իրենք խնդիր չեն տեսնում, Շահենն այդ հետազոտությունն էլ կանցնի, ու կպարզվի, որ ոչ մի խնդիր չկա, ինչպես եղավ Շանթ Հարությունյանի պարագայում: