«Փաստինֆո»-ի տեղեկություններով` Քննչական կոմիտեն քրեական գործ է հարուցել Դանիել Իոաննիսյանի ընտանեկան կյանքին վերաբերող տվյալները հրապարակելու դեպքի առթիվ:
Հիշեցնենք, որ «Իրավունք» թերթը հրապարակել էր քաղաքացիական ակտիվիստ Դանիել Իոաննիսյանի ընտանեկան վեճերի վերաբերյալ տեղեկություններ, որոնց առթիվ տարիներ առաջ հաղորդումներ են ներկայացվել ոստիկանությունում եւ դրանց հիման վրա նյութեր են նախապատրաստվել:
Նկատենք, որ մասնավոր և ընտանեկան կյանքի, պատվի ու բարի համբավի անձեռնմխելիությունը երաշխավորված է ՀՀ Սահմանադրության 31-րդ հոդվածով, ըստ որի «յուրաքանչյուր ոք ունի իր մասնավոր և ընտանեկան կյանքի, պատվի ու բարի համբավի անձեռնմխելիության իրավունք»:
Իսկ ՀՀ քրեական օրենսգրքի 144-րդ հոդվածը քրեական պատասխանատվություն է նախատեսում անձնական կամ ընտանեկան կյանքի մասին տեղեկություններ ապօրինի հավաքելու, պահելու, օգտագործելու կամ տարածելու համար:
Մասնավոապես արգելվում է մարդու անձնական կամ ընտանեկան գաղտնիք համարվող տեղեկությունները նաեւ լրատվության միջոցներով տարածելն առանց նրա համաձայնության:
«Փաստինֆո»-ին հայտնի դարձավ, որ ՀՀ ՔԿ հատկապես կարեւոր գործերի քննության գլխավոր վարչությունում քրեական գործ է հարուցվել հենց 144-րդ հոդվածով:
