«Հանրապետական» կուսակցությունը ցավում է «Հաց բերող» Արթուր Սարգսյանի մահվան կապակցությամբ: Այս մասին այսօր ՀՀԿ ԳՄ նիստից հետո հայտարարեց ԱԺ փոխնախագահ, ՀՀԿ խոսնակ Էդուարդ Շարմազանովը:
«Ուզում եմ մեր ցավակցությունը հայտնել: Ցավում ենք բոլորս, բոլորիս անունից ցավակցություն ենք հայտնում: Ցանկացած հայ մարդու կորուստ մեզ համար ցավալի է»,- նշեց Շարմազանովը:
«Ինչքանով տիրապետում եմ ինֆորմացիայի, իսկ կարծում եմ, որ այն հնարավորինս օբյեկտիվ է, Արթուր Սարգսյանի հացադուլի ժամանակ նրա բուժող բժիշկները, շտապ օգնությունը մի քանի անգամ նրան առաջարկել են տեղափոխվել քաղաքացիական հիվանդանոց, բայց Ա. Սարգսյանը մերժել է:
Շարմազանովը նշեց, որ տեղյակ է Արթուր Սարգսյանի փաստաբանների հայտարարությանը, որտեղ կասկած է հնչում նրա մահվան պատճառների վերաբերյալ: Այս առնչությամբ ԱԺ փոխնախագահն ասաց, որ եթե Արթուր Սարգսյանի փաստաբանները, հասարակությունը, նրա բարեկամները պնդում են, որ անհրաժեշտ է բժշկական փորձաքննություն, ապա իրենք որևէ խնդիր չեն տեսնում: «Եթե փորձաքննության դեպքում պարզվի, որ անբարեխիղճ գործողություններ են կատարվել, օրենքի խախտում է տեղի ունեցել, առանց վարանելու կարող եմ հայտարարել, որ մեղավորները կպատժվեն»,- հայտարարեց Է. Շարմազանովը:
Դիմեց այն ուժերին, ովքեր փորձում են «այս դժբախտությունը վերածել նախընտրական կրքերի, դիվիդենտներ շահելու», Շարմազանովը նշեց. «Մարդկային ողբերգության վրա փորձել դիվիդենտներ շահել, ես դա ճիշտ չեմ համարում: Մեղավորներ եթե կլինեն, մեղավորները թող պատժվեն»:
Մանրամասները՝ տեսանյութում:
