«Մեդիամաքսին» տված հարցազրույցում վարչապետ Կարեն Կարապետյանը պատասխանելով 2018 թվականին վարչապետության ցենզին համապատասխանելու վերաբերյալ հարցին՝ հայտարարել է, թե կարծում է, որ 2018-ին բավարարած կլինի վարչապետի թեկնածու լինելու պահանջներին:
Ինչպես հայտնի է, Կարեն Կարապետյանի պարագայում կա Հայաստանում վերջին չորս տարում մշտական բնակության խնդիր, որի պատճառով նա չընդգրկվեց ՀՀԿ համամասնական ցուցակում: Վարչապետի պաշտոնի համար այդ պահանջը դեռևս չի գործում, և Կարապետյանը կարող է լինել վարչապետ 2017-ի խորհրդարանական ընտրության արդյունքում: Սակայն 2018-ի ապրիլից հետո այդ պահանջը պարտադիր է նաև վարչապետի թեկնածուի համար: Իսկ 2018-ի ապրիլին կառավարությունը պետք է հրաժարական տա այն բանից հետո, երբ լրանա Սերժ Սարգսյանի նախագահական պաշտոնավարման ժամկետը: Դրանից հետո պետք է ձևավորվի նոր կառավարություն, և վարչապետի համար այլևս պետք է պարտադիր լինի վերջին չորս տարում Հայաստանում մշտական բնակության պահանջը: Այդ պահանջը չի ենթադրում անդադար բնակություն, այլ որոշակի օրերի քանակ, որոնց չափով Հայաստանում գտնվելը կհամարվի չորս տարի մշտական բնակություն:
Այստեղ արդեն ակնհայտ է, որ առաջանում է հաշվարկային կամ թվաբանական ճկունության մեծ դաշտ, սակայն տվյալ պարագայում դա չէ խնդիրը, այլ այն, որ Կարեն Կարապետյանը փաստորեն առաջին անգամ բավական հստակ հայտարարում է 2018-ից հետո վարչապետ լինելու կամ մնալու իր հավակնության մասին:
Բանն այն է, որ մինչ այս նա փորձում էր շրջանցել այդ հարցերը, ինչպես և ամբողջ իշխանական համակարգը: Սակայն այժմ Կարեն Կարապետյանը հայտարարում է, որ իր կարծիքով՝ կբավարարի 2018-ի վարչապետի պահանջին: Այսինքն՝ սա գործնականում հայտ չէ, սակայն ըստ էության հայտարարություն է այն մասին, որ առնվազն սահմանադրական կամ օրենսդրական արգելքը վարչապետի պաշտոնի ճանապարհին նա հայտարարում է 2018-ի համար հանված, այսպես ասած՝ անվավեր: Այսինքն՝ Կարեն Կարապետյանը արդեն իսկ հայտարարում է, որ այդ արգելքը չի կարող դրվել իր դեմ որպես փաստարկ:
Այս հայտարարությունն, անկասկած, ուղղված է ավելի շուտ իշխանությանը, քան հասարակությանը, քանի որ Կարեն Կարապետյանի համար գլխավոր խնդիրը վարչապետության հարցում մինչև հասարակությանը հասնելը՝ հենց իշխանության մեջ է, ավելի շուտ՝ Սերժ Սարգսյանի, առաջին հերթին: Ըստ այդմ, Կարապետյանը հայտարարում է, որ Սերժ Սարգսյանին թույլ չի տա իր դեմ կիրառել սահմանադրական արգելքի փաստարկը: Այսպիսով՝ Սերժ Սարգսյանը պետք է փնտրի երևի թե այլ փաստարկներ, թե ինչու չպետք է առաջադրի Կարեն Կարապետյանին 2018 թվականին:
Այն, որ Կարեն Կարապետյանը խորհրդարանական ընտրությունների շեմին փաստորեն բավական որոշակիացնում է 2018-ի համար առնվազն պայքարելու իր մտադրությունը՝ վկայում է, որ նա ստացել է դրա հետ կապված մտահոգիչ ազդակներ և փորձում է կանխարգելել դրանք: Կարապետյանի մասով քննարկումներ ծավալվեցին, իհարկե, ՀՀԿ համամասնական ցուցակում թե՛ նրա անվան, թե՛ նրա կառավարության մեջ, այսպես ասած, իր նախարարական թիմի անդամների անունների բացակայության մասով: Առավել ևս՝ հաշվի առնելով այն հանգամանքը, որ համամասնական ցուցակը գլխավորեց պաշտպանության նախարար Վիգեն Սարգսյանը, որը նոր կառավարությունում Սերժ Սարգսյանի ակնհայտ հենարանն է, և ոչ միայն նոր կառավարությունում, այլև նոր քաղաքական իրավիճակում, ինչի մասին Սարգսյանը բավականին բաց ենթատեքստով ակնարկեց նաև նախօրեին պաշտպանության նախարարության և բանակի ղեկավար կազմի առաջ ունեցած ելույթում:
Այս տեսանկյունից Կարեն Կարապետյանի հարցազրույցը՝ անկախ, իհարկե, այն հանգամանքից, որ դա անկասկած Սերժ Սարգսյանի ելույթից ավելի վաղ արված հարցազրույց էր, այնուհանդերձ՝ ստացվեց այդ ելույթին տրված պատասխան:
Լուսանկարը՝ Getty Images-ի