Բոլոր սրբերի օրվա նախօրեին աշխարհի մի շարք երկրներում նշվում է Հելոուինը, որն առնվազն 2000 տարվա պատմություն ունի։ Դրա ակունքները գալիս են Իռլանդիայի և Շոտլանդիայի կելտերի մշակույթից։ Հելոուինն ավանդաբար տոնում են անգլախոս երկրներում։
20-րդ դարի վերջում գլոբալիզացիայի արդյունքում Հելոուինը սկսել են տոնել նաև ոչ անգլախոս երկրներում։ Հելոուինը ոչ պաշտոնապես տոնում են մի շարք այլ երկրներում, որոնք սերտ մշակութային կապեր ունեն ԱՄՆ-ի կամ Մեծ Բրիտանիայի հետ, օրինակ՝ Ճապոնիայում, Հարավային Կորեայում, Սինգապուրում, Ավստրալիայում և Նոր Զելանդիայում, մի շարք կղզի-պետություններում, վերջին տարիներին՝ Ռուսաստանում և ԱՊՀ այլ երկրներում։
Հելոուինի նախատիպն ամենից հավանական է, որ առաջացել է կելտական հեթանոսական Սամայն տոնից, որի բնութագիրը իռլանդական հին գրականության մեջ հայտնվել է 10-րդ դարից սկսած: Այս տոնի անվանումը առաջացել է հին իռլանդերեն Samhain բառից, որը նշանակում է «ամռան ավարտ»։
Շոտլանդիայում Հելոուինի խորհրդանիշը շաղգամն էր, բայց Հյուսիսային Ամերիկայում դրան փոխարինել է դդումը՝ որպես ավելի էժան բանջարեղեն: Առաջին անգամ Ամերիկայում լուսատու դդումների պատրաստումը արձանագրվել է 1837 թվականին։
Մոտ 16-րդ դարում առաջացել է հոկտեմբերի 31-ին քաղցրավենիք խնդրելու սովորույթը։ Երեխաները և մեծահասակները հագնում էին դիմակներ և տնից տուն անցնելով՝ պահանջում հյուրասիրություն։
