Հարևանության քաղաքականության և ընդլայնման հարցերում եվրահանձնակատար Օլիվեր Վարհելը համատեքստից կտրված է համարում Վրաստանի վարչապետի հայտարարությունը: Իրակլի Կոբախիձեն ավելի վաղ ասել էր, որ հեռախոսազրույցի ընթացքում եվրահանձնակատարներից մեկը սպառնացել է իրեն: Իրակլի Կոբախիձեն պնդում է, որ «եվրահանձնակատարներից մեկը» թվարկել է մի շարք միջոցներ, որոնք կարող են ձեռնարկել արևմտյան քաղաքական գործիչները» օտարերկրյա գործակալների» մասին օրենքի վրա դրված վետոն հաղթահարելուց հետո և, թվարկելով այդ միջոցները, նշել է. «Դուք տեսնում եք, թե ինչ է տեղի ունեցել (Սլովակիայի վարչապետ) Ֆիցոյի հետ և պետք է շատ զգույշ լինեք»:
Իր հերթին, Օլիվեր Վարհելին նշել է, որ Վրաստանի ներկայիս քաղաքական իրավիճակում զգալի ջանքեր է գործադրում, որպեսզի համոզի Վրաստանի քաղաքական ղեկավարությանը՝ չընդունել վիճահարույց օրենքը, «որը կարող է խաթարել Վրաստանի ճանապարհը դեպի ԵՄ»․
«Լիովին գիտակցելով վրաց հասարակության մեջ շատ ուժեղ եվրոպամետ տրամադրությունները՝ հեռախոսազրույցի ժամանակ անհրաժեշտ համարեցի վարչապետի ուշադրությունը հրավիրել այն բանի վրա, թե որքան կարևոր է առանց այդ էլ անկայուն իրավիճակը չսրել այս օրենքի ընդունմամբ, որը կարող է հանգեցնել հետագա բևեռացման և Թբիլիսիի փողոցներում հնարավոր անվերահսկելի իրավիճակների: Այս կապակցությամբ Սլովակիայում տեղի ունեցած վերջին ողբերգական իրադարձությունը որպես օրինակ բերվեց, թե ինչի կարող է հանգեցնել հասարակության մեջ բևեռացման նման բարձր մակարդակը՝ նույնիսկ Եվրոպայում»։
Հեռախոսազրույցի մի մասը ոչ միայն ամբողջությամբ կտրված է համատեքստից, շարունակում է Վարհելին, այլև հանրությանը ներկայացվել է «այն ձևով, որը կարող է հանգեցնել հեռախոսազրույցի սկզբնական նպատակի ամբողջական սխալ մեկնաբանմանը»:
Եվրահանձնակատարը նշում է, որ նախկինի պես կոչ է անում Վրաստանի իշխանություններին՝ չընդունել «օտարերկրյա գործակալների» մասին այդ օրենքը և շարունակում է աջակցել վրացիներին, որոնք ձգտում են դեպի եվրոպական ապագա: