«Առաջին լրատվական»-ի զրուցակիցն է ԱԺ նախկին պատգամավոր Հակոբ Հակոբյանը(Ճոյտ):
– Պարոն Հակոբյան, ի՞նչ ակնկալիքներ կան նոր կառավարությունից: Արդյո՞ք դրական սպասումներ կան:
– Կարծում եմ՝ ցանկացած փոփոխություն, որի նպատակը դրական է, անպայման օգուտ կտա մեր պետությանն ու ժողովրդին: Նոր վարչապետը ունի անցած ճանապարհ և տեսնում եմ այդ ճանապարհին նրա կատարած աշխատանքները: Այսօր նրան չի հետաքրքրում փողը, տեսնում եմ, որ նրան հետաքրքրում է միայն հայրենասիրությունը և հետագա իր անունը, որը պետք է թողնի ՀՀ-ում որպես նոր վարչապետ: Ես կարծում եմ՝ չենք կարող վարչապետին գումարով գայթակղել, նա դրա խնդիրը չունի: Կարծում եմ՝ նա ուզում է պատմության մեջ մնալ որպես վարչապետ, որ կարող է աշխատանքներ իրականացնել ի շահ մեր պետության և ժողովրդի: Կարծում եմ՝ դա նրան կհաջողվի:
– Ինչո՞ւ մինչև հիմա մյուս կառավարություններին դա չի հաջողվել: Քաղաքական կամքի բացակայությո՞ւնն է պատճառը:
– Ոչ թե չի հաջողվել, այլ մարտահրավերները հաջորդում են մեկը մյուսին՝ Ռուսաստանի նկատմամբ կիրառված պատժամիջոցները, ապրիլյան դեպքերը և այլն: Անկախ կառավարության կամքից՝ խնդիրներ են առաջանում, որը շատ դժվար է լինում լուծել: Ընդամենը երկու օրվա պատերազմը տնտեսությունը հետ է գցում: Նախորդ կառավարությունն էլ ամեն ինչ փորձել է անել, բայց այդտեղ, կարծես, քաղաքական կամքը պակասեց: Այսօր կա քաղաքական կամք, և ես համոզված եմ, որ դրական արդյունք ենք ունենալու:
– Կարծում եք՝ օլիգարխիայի, մենաշնորհների դեմ հնարավո՞ր է իրական պայքար, երբ նրանք են իշխանության երկարակեցությունն ապահովում:
– Եթե կա քաղաքական կամք,պայքարը շատ հեշտ է, որովհետև կան հանձնաժողովներ, որոնք պետք է պայքարեն այդ մենաշնորհների դեմ: Այսօր ես համոզված եմ, որ եթե ցանկություն, քաղաքական կամք լինի, ապա բոլորը օրենքով ամրագրված պարտականությունը կկատարեն:
– Քաղաքական ի՞նչ ծրագրեր ունեք, մասնակցելո՞ւ եք խորհդրարանական ընտրություններին առաջարկ լինելու դեպքում:
– Տարբեր կուսակցություններից առաջարկություններ եղել են, բայց երբ մենք փորձում ենք խոսել, տեսնել՝ ինչ կարող ենք մենք ունենալ, արդյոք կարո՞ղ են գաղափարները համընկնել, արևմտամե՞տ է, թե՞ դեպի Ռուսաստան է նայում: Եվ քաղաքական դաշտում ևս շատ հետաքրքիր դասավորություններ են տեղի ունենում, նույնպես հետաքրքիր են: Կարևորն այն չէ՝ գնանք թե ոչ, դա չէ կարևորը, կարևորն այն է, որ կարողանանք մի բան անել, որը օգուտ կբերի մեր ժողովրդին և պետությանը:
– ՀՀԿ-ի հետ ճանապարհ տեսնո՞ւմ եք:
– Առհասարակ բոլորի հետ էլ կարելի է ճանապարհ անցնել, բոլոր կուսակցություններն էլ իրար նման են: Հիմա պետք է տեսնել, թե ժողովուրդը որ կուսակցության ծրագրերին կվստահի:
– Իսկ կա՞ մի ուժ, որ կարող է ժողովրդի մոտ վստահություն ներշնչել:
– Կարող է չէ, բոլոր կուսակցություններն էլ վատ ծրագրեր չունեն, այստեղ խնդիրը կայանում է նրանում, թե ժողովուրդը որ կուսակցությանը կվստահի իր քվեն տալով, որ նա կարողանա իրագործել բոլոր ծրագրերը:
– ՏԻՄ ընտրություններից առաջ Դուք բավականին կոշտ գնահատականներ հնչեցրիք, սատարեցինք Արթուր Թումանյանին: Հիմա արդյո՞ք սրված են Ձեր և Կարեն Գրիգորյանի հարաբերությունները:
– Ընտրություններից հետո քաղաքապետարանի աշխատանքով չեմ զբաղվել, չեմ ուսումնասիրել: Ի՞նչ խնդիրներ կարող են լինել իմ և Կարեն Գրիգորյանի միջև: Ես բարձրացրել եմ այն խնդիրները, որոնք ժողովուրդն էր ուզում: Իսկ այն խնդիրները, որոնք իմ անձնական խնդիրներն են, ուզում եմ ասել, որ ես անձնական խնդիրներ չունեմ մեր քաղաքում:
– Պարոն Հակոբյան, իրավապաշտպանները նշում են, որ հազիվ թե բացահայտվի Էջմիածնի քաղաքապետի ընտրություններին նախորդած արյունալի միջադեպը, որին մասնակցել էին երկու քաղաքապետի թեկնածուները: Դուք հավատո՞ւմ եք իրավապահ համակարգին:
– Իհարկե վստահում և հավատում եմ, ինչպես կարելի է չհավատալ: Կրակել են, թե կռիվ է եղել, ինձ ընդհանրապես չի հետաքրքրում: Եվ այսօրվա խնդիրներն եմ վեր հանել այդ օրերին, իսկ թե ով պետք է քրեական պատասխանատվության ենթարկվի, ինձ ընդհանրապես չի հետաքրքրում: Ով օրենքը խախտել է, պատասխանատվության պետք է ենթարկվի:
– Ըստ Ձեզ՝ մեր երկրին իշխանափոխություն պե՞տք է:
– Ի՞նչ է նշանակում իշխանափոխություն: Մոտենում են ընտրությունները, ցանկացած քաղաքացի, որ համաձայն չէ այս կուսակցության վարած քաղաքականության հետ, կարող է գնալ դեմ քվեարկել: Դեմ քվեարկելու արդյունքում կլինի իշխանափոխություն: Ապրիլի 2-ին նախատեսված է ընտրություն, այդ օրը մենք իշխանություն չենք ունենում, ունենում ենք ընտրություն, և ժողովուրդը կընտրի այն կուսակցությանը, որին ուզում է: Բոլորը ցանկանում են փոփոխություն, և բոլորի ծրագրերը նույնն են, սպասենք, տեսնենք ժողովուրդը ո՞ր կուսակցությանը կհավատա, որովհետև կուսակցությունը անելու բան չունի, պարզապես հավատքի խնդիրն է:
– Կարծում եք՝ ժողովուրդը կարող է հավատա՞լ ՀՀԿ-ին:
– Հիմա որ պատասխանեմ, կստացվի, որ ժողովրդի փոխարեն պատասխանում եմ, սպասենք ապրիլի 2-ին, տեսնենք ինչպես ժողովուրդը կգնահատի, հետո եզրակացություն կանենք:
– Պարոն Հակոբյան, շարունակում եք արդյո՞ք ֆիլմեր նկարել:
– Այո, այո, շարունակելու եմ, բայց կարծում եմ, որ երկու տարբերակ ունենք. առաջին՝ կարող ենք նկարել շատ արագացված տեմպերով՝ մինչև ընտրությունները, հնարավոր է, որ չնկարենք, ընտրություններից հետո սկսենք: Սա կախված է տեխնիկական և անձնակազմի հագեցվածության խնդրով: Մենք ունենք դերասան, որը ֆիլմի գլխավոր դերը պետք է իրականացնի: Ռեժիսորը հանդիպել, խոսել է, հիմա եթե ժամանակը ների, կսկսենք նկարահանել:
– Ինչի՞ մասին է ֆիլմը:
– Ֆիլմը կոռուպցիայի մասին է, Հայաստանում տիրող իրավիճակի, մեր իրականության մասին է: Այն կատակերգություն է, բայց իր մեջ պարունակում է ամեն ինչ: Մեր իրականության մասին է:
– Չեք մտահոգվո՞ւմ, որ այս ֆիլմն էլ նախորդի ճակատագրին կարժանանա:
-Չէ՞ որ մենք ամեն օր տեսնում ենք, որ կառավարությունը, Հանրապետության նախագահը, բոլոր կուսակցությունները միտված են կոռուպցիայի դեմ պայքարին: Մենք այսօր ֆիլմով պայքարելու ենք նույն չարիքի դեմ, և չեմ կարծում որևէ մեկը բացասական գնահատական տա, քանի որ մեր նպատակները ազնիվ են:
– Գլխավոր դերն ո՞ւմ եք առաջարկել:
– Դերասանը կարող եմ ասել՝ Միքայել Պողոսյանին ենք ցանկացել, որ Սուպեր պապի դերը խաղա: Ֆիլմի անունը «Սուպեր պապա» է, եթե ընթացքում մասնագետները չփորձեն ավելի համոզիչ վերնագիր ասեն, այս վերնագիրն ենք թողնելու: Սուպեր պապին անարդարությունների դեմ պայքարող մարդն է: Հիմա տեսնենք որքանով այն կստացվի: Եթե դերասանների մասով պայմանավորվածություն լինի՝ կսկսենք ավելի շուտ:
