Շվեյցարական Novartis AG դեղագործական ընկերությունը մշակում է հատուկ դեղահաբեր, որոնք կպարունակեն չիպեր` արդյունավետության ցուցիչներով: Chip-in-a-pill համակարգով ստեղծված նոր սերնդի դեղորայքը միկրոսկոպիկ չափերի ներկառուցված էլեկտրոնային չիպ է ունենալու: Բավական է կուլ տալ հաբը և այն կսկսի ոչ միայն ապաքինել, այլև վերլուծել, թե որքանով էր այն համապատասխանում իր նշանակությանը, հայտնում է РБК Daily-ն:
Ներկայումս բժիշկները, ինչպես հայտնի է, կարողանում են գնահատել` որքանով ճիշտ բուժում են նշանակել, միայն հիվանդի գանգատների և ախտանիշերի հիման վրա: Սակայն շվեյցարացի գիտնականները վստահ են, որ մարդկությունը պետք է տիրապետի շատ ավելի ճշգրիտ մեթոդի: Հաբի միջի միկրոչիպը ակտիվացվում է այն բանից հետո, երբ նրա վրա ներգործում է ստամոքսահյութը: Այնուհետև հաբի էլեկտրոնային միջուկը կկարողանա բժշկին ուղարկել հավաքագրված տվյալներն այն մասին, թե տվյալ դեղին ինչպիսի ռեակցիա է տվել հիվանդի այս կամ այն օրգանը:
Նախատեսվում է տվյալները փոխանցել համացանցի կամ հեռախոսի միջոցով: Chip-in-a-pill համակարգը կարելի է ներդնել ինչպես նոր, այնպես էլ արդեն գոյություն ունեցող դեղորայքի մեջ:
