«Առաջին լրատվական»- ի զրուցակիցն է «Նոր Հայաստան» հանրային փրկության ճակատի անդամ Անդրիաս Ղուկասյանը:
-Պարոն Ղուկասյան, արդյո՞ք նման գործողությունների դիմելուց առաջ «Նոր Հայաստան» հանրային փրկության ճակատում քննարկումներ եղել են: «Նոր Հայաստան»-ը որպես վերջնական նպատակ արդյո՞ք ունեցել է զինված պայքարի մեթոդներով հասնելու Սերժ Սարգսյանի հրաժարականին:
-«Նոր Հայաստան»-ը ձևավորվելու ժամանակ ընդունել է հռչակագիր, որտեղ, որպես ծրագրային նպատակներ, նշել է՝ կասեցնել նոր Սահմանադրության ներդրումը, հասնել քրեական ռեժիմի հեռացմանը և Հայաստանում լեգիտիմ իշխանությունների ձևավորմանը ազատ, արդար ընտրությունների միջոցով, և որպես մեթոդ՝ այդ ամենի համար ընտրված էր խաղաղ քաղաքացիական աննազանդությունը: Այս գործողությունները, որոնք տեղի են ունեցել վերջին օրերին, երբեք չեն քննարկվել «Նոր Հայաստան»- ի քաղաքական խորհրդի նիստերում:
-Ինչքանո՞վ է կառույցն արդարացնում այս գործողությունները, եղե՞լ է արդյոք հենց այդ մասով քննարկում:
-Այս մասով քննարկում չի եղել, կառույցի անունից ես հիմա չեմ կարող որևէ բան ասել, մոտակա ժամանակում տեղի կունենա քաղխորհրդի նիստ, մեր ընդհանուր գնահատականը կտանք, թեպետև կառույցի որոշ անդամները այստեղ չեն՝ Հմայակ Հովհաննիսյանը Մոսկվայում է, Ժիրայր Սեֆիլյանը ձերբակալված է, քվորումի խնդիր կա, բայց ես վստահ եմ՝ մոտակա ժամանակում «Նոր Հայաստան»- ն իր դիրքորոշումը կներկայացնի:
Ինչ վերաբերում է իրավիճակի ընդհանուր գնահատականին, ապա սկսած 2016-ի ապրիլի 2-ից մինչև հունիսի 20-ը Սերժ Սարգսյանի գործողությունները հիմք են տալիս մտածելու, որ նա աջակցել է Ադրբեջանի թշնամական գործողություններին ՀՀ-ի և Արցախի դեմ. սա այն կարևոր քաղաքական հանգամանքն է, որն ըստ երևույթին ազդել է տղաների այդ որոշման վրա:
-Պարոն Ղուկասյան, Սերժ Սարգսյանի կոնկրետ ո՞ր գործողությունների մասին է խոսքը:
-Օրինակ՝ Հայաստանը որևէ քայլ չի արել Ադրբեջանին որպես ագրեսոր ճանաչելու համար: Դուք տեղյակ եք, և ձեր կայքը ևս տարածել է այն տեսագրությունը, որը վկայում է, որ ադրբեջանական զինվորները ներթափանցում են: Հայաստանը սատար չի կանգնել այդ պահանջին՝ հարուցել միջազգային հետաքննություն, և մի շարք այլ գործողություններ, որոնք վկայում են, որ Ս. Սարգսյանի գործողությունները պարունակում են ՀՀ Քրեական օրենսգրքի 299 հոդվածով (պետական դավաճանություն) նախատեսված հատկանիշներ, այսինքն՝ դա հակառակորդ պետության գործողություններին աջակցություն ցուցաբերելն է:
Այլ քաղաքական հանգամանքները Հայաստանում… Հիշում եք, որ անցյալ տարի՝ հոկտեմբերի 27-ին, բավական հիմնավորված փաստաթուղթ ներկայացվեց ԱԺ-ին և պահանջ ներկայացվեց «Ոտքի, Հայաստան»- ի կողմից՝ քննարկել Սերժ Սարգսյանի իմպիչմենթի հարցը, հիմքում դրված էին փաստական հանգամանքներ… Պատասխանը եղավ այն, որ ԱԺ նախագահը ներկայացրեց, որ ԱԺ մեծամասնությունը նպատակահարմար չի գտնում նման քաղաքական հարց քննարկել:
Այսպիսի պայմաններում, ծայրահեղ անհրաժեշտության և անհրաժեշտ ռիսկի գործողությունների շրջանակում, իմ կարծիքով, կարող էին առաջանալ նման զինված գործողություններ քաղաքացիների կողմից, որովհետև բացակայում է օրինական եղանակներով նման հարցերին լուծում տալը: Երկրի նախագահի պաշտոնը զբաղեցնող անձի կողմից պետական դավաճանությունը առնչվում է իմպիչմենթի գործընթացի հետ, և եթե այդ գործընթացը անհնար է, որովհետև ԱԺ մեծամասնությունը դեմ է նման հարցեր քնարկելուն, բնականաբար քաղաքացիները խնդիր ունեն այլ ճանապարհով լուծում գտնել:
Հարցազրույցն ամբողջությամբ՝ տեսանյութում: