Ֆրանսիացի լրագրողը երեք ամսով ներթափանցել է ապագա ջիհադիստների արմատական բջիջ և թաքնված տեսախցիկով նկարահանել, թե ինչպես են նրանք ահաբեկչություն ծրագրել Փարիզում ԴԱԻՇ-ի անունից։
Սաիդ Ռամզի կեղծանվամբ՝ նա հետաքննություն է անցկացրել «Ալլահի զինվորները» վավերագրական ֆիլմի համար, որը պետք է պատմի այն մասին, թե ովքեր են երիտասարդ ջիհադիստները։ Ֆիլմի ցուցադրությունը Ֆրանսիայոմ սպասվում է այսօր։
«Իմ նպատակն էր հասկանալ, թե ինչ է տեղի ունենում նրանց գլխում»,- ասել է լրագրողը France Presse-ի հետ զրույցում։
«Գլխավոր դասերից մեկը դարձավ այն, որ նրանց գործողություններում երբեք չեն դիտվել իսլամի նշաններ։ Չի եղել աշխարհը բարելավելու ցանկություն։ Միայն կորած, շփոթված, ինքնասպան հակումներով, հեշտությամբ շահարկումների ենթարկվող երիտասարդներ»,- նշել է Ռամզին։
Ռամզին հայտնել է, որ արմատականների հետ կապ հաստատելը հեշտ է եղել՝ սոցցանցի միջոցով։ Դրանից հետո նա մշտապես գտնվել է նրանց ճամբարում։ Մի անգամ մի կին նրան է փոխանցել հրահանգներով նամակ։ Նամակում պլան էր, թե ինչպես անցկացնել հարձակում, որի թիրախն էր գիշերային ակումբը։
Մինչ պլանի իրագործումը՝ խումբը ձերբակալվել է իրավապահ մարմինների աշխատակիցների կողմից, նրանց պլանները ձախողվել են։