Ռուսաստանի կողմից Հայաստանին մատակարարվող զինատեսակների ցանկը հպարակելը յուրօրինակ քաղաքական ուղերձ է: Դրանով Ռուսաստանը զգուշացրել է Ադրբեջանին, որ Լեռնային Ղարաբաղի հակամարտության հետագա էսկալացիան անընդունելի է:
«Առաջին լրատվական»-ի հետ զրույցում նման կարծիք հայտնեց ռուս քաղաքագետ Ալեքսանդր Սկակովը՝ միաժամանակ չհամաձայնվելով, որ դա կարող էր քաղաքական ուղերձ լինել նաև Թուրքիային կամ ՆԱՏՕ-ին:
«Կարծում եմ՝ այստեղ ամեն ինչ պարզ է: Զենքերի ցանկը հենց այնպես չի հրապարակվում. դրանով ակնարկվում է, որ հակամարտության հետագա էսկալացիան անընդունելի է և հղի է բացասական հետևանքներով: Թուրքիան ՆԱՏՕ-ի անդամ է, այդ պատճառով թե՛ Ռուսաստանը և թե՛ ՆԱՏՕ-ն զգույշ են գործելու: Այնպես որ, սա ուղղված է ոչ թե Թուրքիայի, այլ տվյալ դեպքում՝ Ադրբեջանի դեմ: Հաշվի առնելով թուրք պաշտոնյաների վերջին այցերը Բաքու՝ հնարավոր է՝ սրանով նաև ակնարկվում է, որ Թուրքիան ևս պետք է հաշվի առնի Ռուսաստանի անհանգստությունը»,- ասաց Ալեքսանդր Սկակովը:
Մեր հարցին՝ զինատեսակների ցանկն ամբողջակա՞ն է, թե՞ գուցե կան զինատեսակներ, որոնք չեն հրապարակվել, Սկակովը պատասխանեց. «Մենք չգիտենք՝ ցուցակն ամբողջական է, թե ամբողջական չէ: Ոչ ոք չի կարող երաշխավորել»:
Հիշեցնենք, որ Ռուսաստանի և Հայաստանի միջև կնքված վարկային համաձայնագրով Հայաստանին մատակարարվող զինատեսակների ցանկը հրապարակել էր (http://www.1in.am/1844923.html) ռուսական «Ինտերֆաքս» գործակալությունը՝ հղում անելով իրավական տեղեկատվության պաշտոնական պորտալին: Ռուսական կողմն այս քայլով փաստացի խախտել է ստորագրված պայմանագրի 10-րդ կետը, ըստ որի կողմերը պարտավոր են ձեռնարկել անհրաժեշտ բոլոր միջոցները համաձայնագրում նշված ինֆորմացիայի գաղտնիությունը պահպանելու համար: