ԲՀԿ նախագահ Նաիրա Զոհրաբյանից տեղեկացանք, որ ԲՀԿ քաղխորհուրդը դիմել է կուսակցության այն սկզբնական կազմակերպությանը, որին անդամակցում է Էլինար Վարդանյանը, որպեսզի վերջինս քննարկի կուսակցությունում Էլինար Վարդանյանի մնալու նպատակահարմարության հարցը:
ԲՀԿ կանոնադրությամբ՝ քաղխորհուրդը կուսակցության անդամին կարող է հեռացնել միայն սկզբնական կազմակերպության համապատասխան դիմումի հիման վրա:
Հիշեցնենք, որ Էլինար Վարդանյանը և Ստեփան Մարգարյանը, լինելով ԲՀԿ խմբակցության անդամ, չէին ենթարկվել կուսակցության որոշմանը և չէին մասնակցել Սահմանադրության նախագծի ԱԺ-ում տեղի ունեցած քվեարկությանը, ինչը ԲՀԿ-ն համարել էր հարգելի, սակայն ԲՀԿ-ում Էլինար Վարդանյանին և Ստեփան Մարգարյանին միջազգային խորհրդարանական պատվիրակություններից հետ կանչելը պայմանավորված է ԲՀԿ խմբակցության նիստերին՝ նրանց չմասնակցելով և ընդհանրապես խմբակցության աշխատանքները բոյկոտելով:
Չնայած այս որոշմանը՝ ԲՀԿ-ում դեռ հույս ունեն, որ Էլինար Վարդանյանը ինքը կամավոր դիմում կգրի և դուրս կգա կուսակցությունից: Բայց այդ հույսերն անիմաստ են, քանի որ Էլինար Վարդանյանը ցանկանում է հանդես գալ որպես քաղհալածյալ, իսկ դրա համար անհրաժեշտ է, որ նրան հեռացնեն կուսակցությունից:
Հիշեցնենք, որ Էլինար Վարդանյանը ԲՀԿ քվոտայով ԱԺ մարդու իրավունքների և հանրային հարցերի հանձնաժողովի նախագահն է, իսկ Ստեփան Մարգարյանը՝ տեղական ինքնակառավարման և տարածքային կառավարման հանձնաժողովի նախագահը: Բայց այս պաշտոններից նրանց հեռացնելը ավելի բարդ գործընթաց է, քանի որ դրա համար անհրաժեշտ է ԱԺ-ում քվեարկություն կազմակերպել: Չի բացառվում, որ ԲՀԿ-ն գնա նաև այդ պաշտոններից Էլինար Վարդանյանին և Ստեփան Մարգարյանին հետ կաչելու ճանապարհով:
Լուսանկարը՝ Photolure-ի