Գերմանիան ձգտում է Ռուսաստանի հետ կառուցողական հարաբերությունների, բայց ուկրաինական ճգնաժամի պատճառով Մոսկվայի նկատմամբ ԵՄ-ի սահմանած պատժամիջոցները հանելու ժամանակը դեռ չի եկել: Welt Online պարբերականի հաղորդմամբ՝ այս մասին հայտարարել է Գերմանիայի կանցլեր Անգելա Մերկելը Վիեննայում Գերմանա-ավստրիական առևտրային պալատի 60-ամյակին նվիրված տոնական միջոցառման ժամանակ:
Մերկելը խոստովանել է, որ «Ռուսաստանի դեմ պատժամիջոցների հետևանքով մի շարք ընկերություններ են տուժում»: «Ուստի մենք ուզում ենք հասնել քաղաքական շրջանակային պայմանների, որոնք հնարավորություն կտային չեղարկել պատժամիջոցները»,- ասել է Մերկելը:
Սակայն, նրա խոսքով, «հաշվի առնելով միջազգային իրավունքի լուրջ խախտումները և Ուկրաինայի արևելքում անկայուն իրավիճակը»՝ պահը (սահմանափակող միջոցառումների չեղարկման), «ցավոք, դեռ չի եկել»:
Ինչպես Գերմանիան, այնպես էլ Ավստրիան ձգտում են «Ռուսաստանի հետ գործընկերային հարաբերությունների», նշել է նա: «Մենք պետք է այնքան շատ միջազգային խնդիրներ լուծենք, որ կուզենայինք վերադառնալ կառուցողական համագործակցության: Իրանի հետ համաձայնագրի օրինակով մենք տեսանք, որ կարելի է Ռուսաստանի հետ միասնության հասնել»,- ասել է Մերկելը: Նա հույս է հայտնել, որ Մոսկվան «կարևոր դեր կխաղա» նաև Սիրիայում հակամարտության կարգավորման գործում: