Աշխարհում ավելին քան 800 միլիոն մարդ ապրում են ծայրահեղ աղքատության մեջ և մատնված են սովի, ասվում է Հազարամյակի հռչակագրի նպատակների կատարման եզրափակիչ ելույթում, հայտնում է RIA Novosti-ն:
2000 թվականին ՄԱԿ-ի կողմից ընդունված Հազարամյակի հռչակագրով սահմանվել է զարգացման 8 նպատակներ, որոնք պետք է կատարվեին մինչև 2015 թվականը: Նպատակների մեջ է մտնում աղքատության և սովի վերացումը, նախնական կրթության ապահովումը, կանանց հասանելիությունը կրթությանը և քաղաքականությանը, երեխաների մահացության կրճատումը, մայրական առողջության բարելավում, ՄԻԱՎ-ի, ՁԻԱՀ-ի և մալարիայի դեմ պայքարը:
Չնայած, որ 15 տարի իրականացվում է այդ ծրագիրը, սակայն աշխարհում միլիոնավոր մարդիկ դեռևս բախվում են այդ խնդիրների հետ:
Ըստ ներկայացված փաստաթղթի՝ 1990 թվականից հաշված ծայրահեղ աղքատների թիվը կրճատվել է 2 անգամ և կազմում է 836 միլիոն մարդ: ՄԻԱՎ-ով վարակվածների թիվը կրճատվել է 40%-ով և կազմում է 2.1 միլիոն: Ավելի քան 6 միլիոն մարդու հաջողվել է փրկել մալարիայից: Թոքախտից բուժվել է 37 միլիոն մարդ: Այսօր 57 միլիոն երեխա չի հաճախում դպրոց, 15 տարի առաջվա 100 միլիոնի դիմաց:
Ինչպես հայտարարել է ՄԱԿ-ի գլխավոր քարտուղարի խորհրդականը, «աշխարհն աներևակայելի հարուստ է, բայց դեռևս շատ կան աղքատ մարդիկ: Ոչ մի բան չկա, որ մենք չկարողանանք անել»,- ասել է նա, ելույթ ունենալով ՄԱԿ-ում:
Նրա խոսքերով՝ Հազարամյակի հռչակագրում առաջադրված խնդիրներն ավելի շուտ բարոյական են, քան տնտեսական:
