«Ռուսաստանի հետ հարաբերություններում մենք կարող ենք և պարտավոր ենք իրար հետ խոսել շիտակ բոլոր խնդիրների մասին»,- «Առաջին լրատվական»-ի հետ զրույցում նշեց ԿԳ նախարար Արմեն Աշոտյանը՝ անդրադառնալով վերջին օրերին Սերժ Սարգսյանի այն հայտարարությանը, թե ՀՀ-ն մտահոգված է ՌԴ-ի կողմից Ադրբեջանին զենքի վաճառքով:
«Իրականում Հայաստանի արտաքին քաղաքականությունում շարունակվում է այն ճանապարհը, որի մասին վերջին տարիներին խոսում ենք: Հայաստանն իր արտաքին քաղաքականության մեջ առաջնորդվում է իր ազգային ու պետական շահով` միաժամանակ փորձելով իր արտաքին քաղաքականության մեջ համադրել գերտերությունների շահերը և երբեք չդառնալ հակադրությունների գոտի: Մենք ունենք ռազմավարական գործընկերությունը ՌԴ-ի հետ, մեզ համար խիստ կարևոր են զարգացող հարաբերությունները ԵՄ-ի ու ԱՄՆ-ի հետ: Դուք ինքներդ ականատես եք լինում Չինաստանի հետ խորացող համագործակցությանը, և այս ամենը բազմավեկտոր արտաքին քաղաքականության ամենատիպիկ դրսևորումներն է»,- ասաց նա:
Դիտարկմանը, թե երկար ժամանակ ՀՀԿ-ական գործիչները փորձում էին արդարացնել ՌԴ-ի կողմից Ադրբեջանին զենքի վաճառքը՝ նշելով, որ դա ընդամենը բիզնես ծրագիր է, մինչդեռ Սերժ Սարգսյանի հայտարարությունից հետո ՀՀԿ-ականների խոսքի տոնայնությունն ու շեշտադրումները փոխվեցին, Աշոտյանն արձագանքեց. «Ինչ վերաբերում է ՀՀ նախագահի` ՌԴ-ի կողմից Ադրբեջանին վաճառված զենքի վերաբերյալ հայտարարությանը, ակնհայտ է, որ հայ-ռուսական հարաբերություններն ունեն այնպիսի պատմություն, ժառանգություն, փոխհամագործակցության մշակույթ, որ մենք կարող ենք և պարտավոր ենք իրար հետ խոսել շիտակ բոլոր խնդիրների մասին: Ե՛վ Հայաստանը, և՛ Ռուսաստանը կարող են իրար ասել իրականում այն, ինչ մտածում են: Սա ոչ թե վատ հարաբերությունների հետևանք է, այլ ճիշտ հակառակը՝ սա շատ լավ հարաբերությունների արդյունք է, երբ հնարավոր է խոսել բարձրաձայն, շիտակ և պարզ բոլոր առկա խնդիրների մասին:
Հատկանշական է, որ հայ-ռուսական հարաբերություններով իբր թե մտահոգված են այն լրատվամիջոցները, որոնք ժամանակին քննադատում էին, այսօր էլ քննադատում են Հայաստանի եվրասիական ընտրությունը: Մի՛ եղեք ՀՀ իշխանություններից ավելի եվրասիական այս պարագայում»: