Գեղարքունիքի մարզի ընդհանուր իրավասության դատարանում Վահագն Մելիքյանի նախագահությամբ ավարտվել է Էլյանորա (դատական ակտում անունն այդպես է գրված) Բ.-ի գործի դատական քննությունը:
39-ամյա Էլյանորան ամուսնալուծված է, խնամքին ոչ ոք չունի:
Ակնհայտ սուտ մատնություն կատարելու համար նա դեռ 2011 թվականին նույն մարզի ընդհանուր իրավասության դատարանի կողմից դատապարտվել է 1 տարի ազատազրկման, նրա նկատմամբ համաներում է կիրառվել, նա ազատվել է պատժի կրումից:
Եվ ահա ՀՀ քրեական օրենսգրքի 333 հոդվածի 1-ին մասով՝ նորից սուտ մատնություն կատարելու մեղադրանքով, Էլյանորան, ամբաստանյալի կարգավիճակով, հայտնվել է մարզի ընդհանուր իրավասության դատարանում:
Հետաքրքիրն այն է, որ Էլյանորայի սուտ մատնության «օբյեկտը»՝ տուժողը, դարձյալ նույն մարդն է, ում 2011-ին արդեն սուտ մեղադրել էր իրեն բռնաբարելու համար…
Ըստ ներկա մեղադրանքի՝ 2014 թվականի հունիսի 23-ին, ժամը 14-ին, նախազգուշացված լինելով սուտ մատնություն կատարելու համար նախատեսված քրեական պատասխանատվության մասին, Էլյանորան ոստիկանությունում հաղորդում է տվել, թե հունիսի 15-ին, ժամը 16-ի սահմաններում Դրախտիկ գյուղի տարածքում վիճաբանություն է եղել իր ու Հակոբ Ա.-ի միջև, որի ժամանակ Հակոբը դանակով երկու անգամ հարվածել է իր ձախ ոտքին ու պատճառել է մարմնական վնասվածքներ:
Քննությամբ պարզվել է, որ նշված օրը Էլյանորայի ու Հակոբի միջև վիճաբանություն եղել է, սակայն Հակոբը դանակով չի հարվածել: Էլյանորային կծել է Հակոբի շունը, այդ վնասվածքներն են առկա եղել նրա ոտքին:
Դատարանում Էլյանորան իրեն մեղավոր չի ճանաչել: Նա հայտնել է, թե դեպքի օրը գնացել էր կոն հավաքելու: Հավաքած կոները վաճառել ու վերադարձել է «Տարոն» հանգստյան տան տարածք, որտեղ ապրում և աշխատում է: Տեսել է, որ Հակոբի անասունները մտել են հանգստյան գոտու տարածք:
Զանգել է Հակոբին ու ասել է, որ նա գա ու իր անասունները տանի: Բայց Հակոբն ասել է, թե դրանք իր անասունները չեն:
Ինքը տասը գլուխ անասունները քշել է դեպի Հակոբի տարածքը, որտեղ կանգնած էին Հակոբն ու նրա կինը:
Կինն ասել է, թե իրենց անասուններն են, Հակոբն ասել է՝ իրենցը չեն: Անասունները քշելու ժամանակ իր ձեռքին փայտ չի եղել: Ինքը հարբած չի եղել:
Երբ Հակոբի կնոջ հետ կանգնած խոսել է, Հակոբը հետևից դանակով հարվածել է իր ազդրի շրջանին: Ինքը հարվածի պահը չի տեսել, միայն ծակոց է զգացել, ձեռքը տարել է դեպի ազդրի շրջանը, զգացել է, որ շալվարը կպչում է:
Դրանից հետո ինքը բարձրացրել է ոտքը: Հակոբը դանակով խփել է իր ծնկի շրջանին:
Հարվածները հասցնելիս Հակոբը դանակը մտցրել ու «ֆռռացրել է», հետո էլ թողել ու հեռացել է:
Էլյանորան չի կարողացել նկարագրել դանակը:
Նա ասել է, թե բժշկի է դիմել հունիսի 23-ին: Մինչ այդ մտածել է, թե Հակոբը կհասկանա իր սխալը, կհատուցի իրեն պատճառված վնասը:
Գործով վկա Հակոբը հայտնել է, թե կնոջ ու որդիների հետ բնակվում է վագոն-տնակում: Զբաղվում են անասնապահությամբ:
Դեպքի օրը որդիները գնացել են անասուններին նայելու, ինքն ու կինը եղել են տնակում:
Լսել են իրենց շան հաչոցը: Հասկացել են, որ իրենց տարածք մարդ է մտել:
Կինն անմիջապես դուրս է եկել: Մի քանի րոպե անց աղմուկ է լսվել: Ինքը դուրս է եկել, տեսել է, որ Էլյանորան իրենց անասունները քշել է ճանապարհի մոտ ու հայհոյանքներ է տալիս: Այդտեղ են եղել նաև իր որդիները:
Էլյանորան անպատիվ խոսքեր է ասել իր ընտանիքի հասցեին: Իրենք զգացել են, որ նա ալկոհոլ օգտագործած վիճակում է, Էլյանորայի հայհոյանքներին չեն պատասխանել:
Ինքն ու որդին անասունները քշել են դեպի սար:
Երբ վերադարձել են, մյուս որդուց իմացել են, որ Էլյանորան հարվածել է իրենց շանը, շունը կատաղել ու կծել է նրան:
Իր մոտ դանակ չի եղել, ինքը Էլյանորային դանակով չի հարվածել: Իրենք շանը հարձակվելու հրաման չեն տվել, Էլյանորան է զայրացրել շանը:
Հակոբն ասել է, թե Էլյանորան ցանկանում է վնաս տալ իրեն ու իր ընտանիքին: Նախկինում նա իրեն արդեն սուտ մեղադրել է բռնաբարություն կատարելու համար ու դատվել է սուտ մատնության մեղադրանքով:
Դատահետքաբանական, դատաբժշկական համալիր փորձաքննության եզրակացությամբ՝ Էլյանորայի ոտքի ու տաբատի վնասվածքները չեն առաջացել սուր ծակող-կտրող առարկայի ներգործությունից:
Վնասվածքներն ըստ իրենց տեղակայության և համակցության՝ առաջացել են համեմատաբար սուր ծայր ունեցող առարկայի հետ փոխազդեցության մեջ մտնելու, չի բացառվում՝ շան կծելու հետևանքով:
Ընդհանուր իրավասության դատարանը Էլյանորա Բ.-ին մեղավոր է ճանաչել մեղսագրված արարքի համար՝ ՀՀ քրեական օրենսգրքի 333 հոդվածի 1-ին մասով, և դատապարտել է 3 ամիս ազատազրկման:
Պատժի սկիզբը կհաշվվի ամբաստանյալին փաստացի կալանքի տակ առնելու օրվանից:
