ԱՄՆ-ը և Ռուսաստանը պետք է Ուկրաինայի շուրջ հակամարտությունից այնպես դուրս գան, որ պահպանեն առավել կարևոր միջազգային հարցերի շուրջ համագործակցության հնարավորությունը: TASS-ի հաղորդմամբ՝ այսպիսի կարծիք է հայտնել ամերիկացի ամենահեղինակավոր քաղաքական գործիչներից մեկը՝ նախկին պետքարտուղար Հենրի Քիսինջերը:
«Ամերիկյան և ռուսական շահերը պետք է համընկնեն շատ խնդիրներում, մասնավորապես՝ իսլամական ծայրահեղականության հարցում»,- ասել է նա ԱՄՆ Կոնգրեսի սենատի զինված ուժերի հարցերով կոմիտեի լսումների ժամանակ: Ուստի, նշել է նա, Ուկրաինայի շուրջ իրավիճակն անհրաժեշտ է կարգավորել «այնպես, որ Ռուսաստանը երկարաժամկետ հեռանկարում մնա միջազգային հարաբերությունների մասնակից, որտեղ նա պետք է էական դեր խաղա»:
Մոսկվայի ներկայիս գործողություններն 91-ամյա քաղաքական գործիչը որակում է որպես «մարտահրավեր նետելու փորձ այն պետությունների ռազմավարական կողմնորոշմանը, որոնք երբևէ եղել են իր ուղեծրում»: Բացի դրանից՝ նա պնդում է, որ արևմտյան երկրները պետք է Ուկրաինային օգնեն ապահովելու իր ինքնիշխանությունը և տարածքային ամբողջականությունը:
«Ուկրաինան պետք է լինի անկախ և ազատ պետություն, որն ինքնուրույն կորոշի՝ ինչպիսի հարաբերություններ ունենալ այլ երկրների հետ ՆԱՏՕ-ի անդամակցության հարցին հատուկ մոտեցման դեպքում»,- ասել է Քիսինջերը: