«Պետականության կորստի հետ կապված՝ մտավախություն չունեմ, բայց մենք պետք է հիշենք մի բան, որ մենք ռուսի հետ գործ ունենք, որը այնքան էլ հստակ չէ: Ղազախստանը, Բելառուսը համաձա՞յն են պետականության կորստի հետ: Ինքնիշխանության հարցերում ինչ-որ համաձայնություններ են պետք: Այդ միությունները պատկերացնում եմ կոնֆեդերատիվ կառուցվածքով, ինչպես ԵՄ-ն է, որտեղ պետությունները համագործակցում են: Կրկնում եմ՝ մենք ռուսի հետ գործ ունենք, երբեք չպետք է նվիրվել ռուսին»,- «Առաջին լրատվական»-ի հետ զրույցում ասաց քաղաքագետ Լևոն Շիրինյանը՝ անդրադառնալով ԵՏՄ-ին Հայաստանի հնարավոր անդամակցությանը:
Նրա դիտարկմամբ՝ մինչև 1990 թվականը Ռուսաստանը թե՛ Հայաստանի, թե՛ հայ ժողովրդի նկատմամբ որևէ պարտավորություն չի կատարել: «Նա Սասունի ջարդերի ժամանակ Սուլթանի հետ էր, նա 15 թվականի մայիսի 24-ին հայ ժողովրդի հանդեպ պարտավորություն էր վերցրել, որ պետք է պատժի Թուրքիային և այլն, որովհետև Ցեղասպանությունը եղավ ռուսների նախաձեռնած 12 թվականի հայկական ռեֆորմների պատճառով»,- ասաց նա:
Քաղաքագետն անդրադարձավ նաև Լևոն Հայրապետյանի ձերբակալման խնդրին, թե ինչու Սոչիում Սերժ Սարգսյանը՝ չնայած Պուտինի հետ խոսեց այդ խնդրով, որևէ տեղաշարժ չեղավ. «Դժվարանում եմ ասել՝ Սերժ Սարգսյանը ինչ է ասել և ինչպես, բայց մենք պետք է պահանջենք, որ նորից ասի, մինչև Լևոն Հայրապետյանը այդ պատասխանատվությունից դուրս գա»:
Նա վստահ է, որ եթե մենք ուժեղ չեղանք, Թուրքիան մեզ ոչինչ չի տա: Պետք է պետականորեն կազմակերպվել և անընդհատ ուժեղանալ:
«Իշխանությունը սրբության սրբոցի պես պետք է պետության հեղինակության մասին մտածի՝ իր շահից և անձից առավել: Պետությունն ուժեղ է իր բարոյական ուժով, միայն զենքով չէ. եղել են լավ զինված պետություններ, որ փլվել են, որովհետև իշխանությունը հեղինակություն չի ունեցել»,- ասաց նա՝ անդրադառնալով վերջերս Սյունիքի մարզպետի պաշտոնում Սուրեն Խաչատրյանի նշանակմանը:
«Եթե անգամ ճիշտ էր այդ որոշումը, մարդիկ չեն հավատում, նշանակում է՝ իշխանության հեղինակությունը շատ ցածր է»,- հավելեց քաղաքագետը:
Ավելին՝ տեսանյութում:
