Իսրայելի կառավարությունը հայտարարել է Հորդանան գետի Արևմտյան ափին 400 հա հող միացնելու ծրագրերի մասին, որոնք պատկանում են Պաղեստինի ինքնավարությանը: Այս մասին հայտնում է BBC News-ը:
Հարավային Բեթղեհեմի միացումը կարող է լինել վերջին 30 տարում Իսրայելի տարածքի ամենախոշոր ընդլայնումը: Իշխանությունների խոսքով՝ այս որոշումը պայմանավորված է այս տարվա հունիսին իսրայելցի 3 դեռահասների առևանգման ու սպանության դիմաց փոխհատուցման ցանկությամբ:
Իսրայելի պաշտպանության նախարարությունը տարածքը գրավելու մասին հայտարարել է կիրակի օրը և զինվորականներին հրահանգել է վարչական կառավարում հաստատել Արևմտյան ափին:
Գազայի հատվածի ներկայացուցիչ Սաիբ Արիքաթը հայտարարել է, որ համաշխարհային հանրությունը պետք է Իսրայելին կոչ անի պատասխան տալ «Հորդանանի Արևմտյան ափին և Արևելյան Երուսաղեմում բնակեցման շարունակվող ակտիվության» համար:
Միաժամանակ, ԱՄՆ Պետդեպում այդ քայլն անվանել են «անարդյունավետ» և իսրայելցիների ու պաղեստինցիների միջև «բանակցությունների կարգավորմանը խանգարող»:
Պաղեստինցիները ցանկանում են իրենց պետությանը վերադարձվեն 1967թ. Իսրայելի գրաված հողերը: Սակայն ներկայում այդ տարածքում ապրում է կես միլիոնից ավելի հրեա: