Իշխանությունների մեջ կան բազմաթիվ մեծահարուստ պաշտոնյաներ, և նրանք հայտնի են հայ հանրությանը: Բայց կան շատերը, որոնց մասին հանրությունը նման կարծիք չունի, բայց նրանք ունեն բավականին պատկառելի կարողություն: Այդպիսի պաշտոնյաներին հաջողվել է ստվերում պահել իրենց ու իրենց հարստությունը և համեստ կարողության տեր մարդու տպավորություն ստեղծել:
Իշխանության մեջ կամ իշխող Հանրապետական կուսակցությունում հենց այդ պաշտոնյաների թվին է պատկանում Ազգային ժողովի սոցիալական հարցերի մշտական հանձնաժողովի նախագահ Հակոբ Հակոբյանը:
Մյուս Հակոբ Հակոբյանների հետ չշփոթելու համար նշենք որ նա հայտնի է «Թունելի Հակոբ» մականվամբ: Իսկ այդ մականունն էլ նա ձեռք է բերել «Արփա-Սևան» ընկերության սեփականատերը լինելու արդյունքում:
Խորհրդային տարիներին՝ 1980-1988 թվականներին, նա աշխատել է այդ ընկերությունում, ավելին՝ 1988-ից մինչև 1995թ. այդ ընկերությունում զբաղեցրել է պետի տեղակալի, իսկ մինչև 1999թ.՝ գործադիր տնօրենի պաշտոնները: Անկախության առաջին տարիներին էլ, հավանաբար, սեփականացրել է այդ ընկերությունը:
Իհարկե, «Արփա-Սևանը» Հ. Հակոբյանի միակ սեփականությունը չէ. նրան են պատկանում նաև «Դիլիջանի առողջարան»-ի մոտ 16 տոկոսը, «Բազենք» ընկերության 54 տոկոսը և «Բազալտ» ընկերության 30 տոկոսը:
2012թ. խորհրդարանական ընտրություններից առաջ Կենտրոնական ընտրական հանձնաժողով ներկայացրած գույքի և եկամուտների մասին հայտարարագրում նա ներկայացրել է բազմաթիվ անշարժ գույք՝ հողակտորներ և շինություններ:
Եվ այսպես՝ միայն Վայոց ձորի մարզի Վարդահովիտ գյուղում նա ունի երեք մեծ հողակտոր, որոնցից երկուսը՝ 20-ական հեկտար տարածքով, երրորդը՝ 10 հեկտար:
Հ. Հակոբյանը հայտարարագրել է նաև 7 շենք և շինություն, որոնցից երկուսը՝ Երևանում, 725 և 73 քմ տարածքով:
Գեղարքունիքի մարզի իր հայրենի Ծովինար գյուղում նա ունի երեք շինություն՝ 73, 322 և 36 քմ տարածքով: Նա երկու շենք-շինություն էլ ունի Գեղարքունիքի մարզի Արգել գյուղում՝ 178 և 188 քմ տարածքներով: Այդ հայտարարագրում նշված է, որ պատգամավորն այս բոլոր հողակտորների ու շինությունների ընդհանուր համատեղ սեփականատեր է: Հ. Հակոբյանը նույն կարգավիճակով ևս երկու այլ հողակտոր ունի նաև իր հայրենի Ծովինար գյուղում և մեկը՝ նորից Երևանում: Իսկ Արգել գյուղում երկու հողակտոր էլ վարձակալությամբ է վերցրել:
Հ. Հակոբյանը հայտարարագրել է նաև 2011թ. արտադրության «Մերսեդես բենց» E 300 մակնիշի մեկ ավտոմեքենա: Իսկ Բարձրաստիճան պաշտոնյաների էթիկայի հանձնաժողով ներկայացրած հայտարարագրում նշել է, որ ունի մոտ 45 մլն դրամ և 114.5 հազար դոլար:
Հ. Հակոբյանից ավելի շատ կարողություն է հայտարարագրել ՀՀԿ-ական մեկ այլ պատգամավոր՝ Արմեն Մխիթարյանը: Վերջինս հայտնի է «Աֆղանցի Արմեն» մականունով և Աֆղանստանի պատերազմի վետերանների միության նախագահն է: ՀՀԿ-ական այս պատգամավորն էլ 2012թ. ԿԸՀ ներկայացրած հայտարարագրում նշել է 16 անշարժ գույք, որից 9-ը՝ շենք-շինություններ, իսկ 7-ը՝ հողամասեր:
Եվ այսպես՝ Ա. Մխիթարյանը հայտարարագրել է 2 բնակարան Մամիկոնյանց և Կոմիտաս փողոցներում, 220 քմ տարածքով շինություն՝ կրկին Կոմիտասում, 765 և 1952 քմ տարածքներով ևս երկու շինություն՝ Արշակունյաց փողոցում, ինչպես նաև 227քմ տարածքով շինություն Դեմիրճյան փողոցում: Այս պատգամավորը 3422 քմ տարածքով մի շինություն ունի Սևան քաղաքում և մեկը՝ Լոռու մարզի Ամրակից գյուղում՝ 529 քմ տարածքով:
Ա. Մխիթարյանը Երևանում ունի 5 հողակտոր, որոնք գտնվում են Գրիբոյեդովի փողոցում, Արշակունյաց պողոտայում, Աշտարակի խճուղում և Քանաքեռ ԳԷ-ում, իսկ մյուս երկուսը գտնվում են Սևանում և Ամրակից գյուղում:
Նա մի ռեստորան ունի Կոմիտասի պողոտայի վրա, որը կառուցել է Արաբկիրի թաղապետարանի դիմացի այգում՝ հավանաբար կտրելով այգու ծառերը: Իսկ ռեստորանի հարևանությամբ էլ աշխատեցնում է բացօթյա ամառային սրճարան:
Ա. Մխիթարյանին է պատկանում մակարոնեղեն արտադրող «Խնուս» ընկերությունը: Նա հայտարարագրել է նաև արտասահմանյան երկու թանկարժեք մեքենաներ՝ «Լեքսուս 570» և «Ռենջ Ռովեր սպորտ»: Իսկ այս տարի Բարձրաստիճան պաշտոնյաների էթիկայի հանձնաժողով ներկայացրած հայտարարագրում նշել է, որ ունի 47.2 մլն դրամ և 115 հազար դոլար: Ըստ այդմ՝ անցած տարի նա ստացել է մոտ 60 մլն դրամի եկամուտ: Այս պատգամավորի կինը՝ Արմինե Մխիթարյանը, իր հաշվին ունի 4 մլն դրամ, նաև մեկ թանկարժեք՝ 32 մլն դրամ արժողությամբ LEXUS GX մակնիշի ավտոմեքենա:
ՀՀԿ-ական պաշտոնյաների հայտարարագրերն ուսումնասիրելիս տպավորություն է առաջանում, որ նրանք մեջ-մեջ են արել մեր երկրի ողջ անշարժ հնարավորությունները: Եվ՝ ոչ միայն: