ԱՄՆ-ի` The Heritage Foundation-ի Ռուսաստանի, Եվրասիայի եւ միջազգային էներգետիկ անվտանգության հարցերով փորձագետ Արիել Քոհենը քննադատության է արժանացրել ԱՄՆ նախագահ Բարաք Օբամայի քաղաքականությունը Ռուսաստանի եւ հետխորհրդային պետությունների նկատմամբ: Ինչպես տեղեկացնում է ադրբեջանական 1news.az-ը, Քոհենը The Heritage Foundation-ի բլոգում գրել է, որ Վաշինգտոնը պետք է ամրապնդի իր ռազմաքաղաքական ներկայությունը Կենտրոնական Ասիայում: Փորձագետը կոչ է անում ամրապնդել տնտեսական, քաղաքական եւ ռազմական կապերը Ուզբեկստանի, Թուրքմենստանի եւ Տաջիկստանի հետ: Քոհենը նշում է, որ ԱՄՆ-ը պետք է աջակցի Ղրղզստանի նոր իշխանություններին եւ թույլ չտա Ռուսաստանին ձեռք բերել «Մանաս» ռազմաբազան:
Անդրադառնալով կովկասյան քաղաքականությանը` փորձագետը նշում է, որ ԱՄՆ-ը պետք է զարգացնի կապերն իր ավանդական գործընկերների հետ` Վրաստանում եւ Ադրբեջանում, ինչպես նաեւ այս երկրների բանակին տրամադրի ամենաժամանակակից զինատեսակներ. «Պենտագոնը պետք է ուսումնասիրի ռազմաբազայի ստեղծման հնարավորությունները Վրաստանի, Ադրբեջանի եւ Կենտրոնական Ասիայի տարածքներում»:
