Հայրենական ապրանքարտադրողների միության նախագահ Վազգեն Սաֆարյանն արտահանման համար խոչընդոտներ չի տեսնում: «Առաջին լրատվական»-ի հետ զրույցում նա նշեց, որ ներկայում արտահանմանը նվպաստում է նաև անցած տարեվերջին ընդունված հայեցակարգը:
Վ.Սաֆարյանի խոսքով՝ արտահանողները պետք է կարողանան շուկաներ ձեռք բերել, և դրա համար կառավարությունը պետք է արտաքին գործերի և էկոնոմիկայի նախարարություններին հանձնարարի համատեղ ծրագիր մշակել, որ արտերկրներում ՀՀ առևտրային կցորդների աշխատանքը կարգավորվի, Հայաստանի համար պատվերներ բերվեն և պարզվի, թե որ երկրում ինչ ապրանք կարող է իրացվել. «Եթե լինեն պատվերներ, այստեղ արտադրություն կազմակերպելը խնդիր չի: Այսօր հիմնական խնդիրը շուկայի ձեռքբերումն է»:
Ըստ Սաֆարյանի՝ կառավարությունը խթանում է կոնյակագործության զարգացումը, և պետք է կոնյակի արտահնման ծավալները մեծանան: Ներկայում ՀՀ-ն տարեկան 11 մլն լիտրից ավելի կոնյակ է արտահանում:
«Հանքահումքային ոլորտում արտահանման առումով պետք է այնպես անել, որ ոչ թե պարզ հումք արտահանվի, այլ պատրաստի արտադրանք արտահանվի. կոնկրետ՝ ոչ թե պղնձի խտանյութ, այլ սև պղինձ, իսկ ավելի լավ կլինի, եթե մենք կատոդային պղնձի արտադրություն հիմնենք, որի համար գործարան պետք է կառուցվի, և այդ դեպքում մեր արտահանման ծավալների դրամական շրջանառությունը կմեծանա, իսկ ֆիզիկականը կփոքրանա»,- ասաց Վ.Սաֆարյանը:
Միության նախագահի գնահատականով՝ արտահանողների շարքում ավելի շատ խոշոր բիզնեսն է ներկայացված, իսկ և ՓՄՁ-ները՝ 5-10% սահմաններում են: Սաֆարյանը կանխատեսեց, որ բարենպաստ պայմանների դեպքում այս տարի արտահանման տարեկան ծավալները կկազմեն 1.5 մլրդ դոլար՝ նախորդ տարվա 1.3 մլրդ դոլարի փոխարեն:
Լուսանկարը՝ PanARMENIAN Photo-ի
