Ադրբեջանական 1news.az-ի փոխանցմամբ՝ Միջազգային ճգնաժամային խմբի (ICG) եվրոպական ծրագրերի տնօրեն Սաբինա Ֆրեյզերն անդրադարձել է ԱՄՆ պետքարտուղար Հիլարի Քլինթոնի տարածաշրջանային այցին ու Ղարաբաղյան հակամարտության կարգավորմանը.
«Չնայած Ղարաբաղյան հակամարտության կարգավորման վերաբերյալ նոր առաջարկներով հանդես գալու՝ ԱՄՆ-ի ցուցաբերած պատրաստակամությանը՝ մոտ ապագայում չպետք է բեկում սպասել բանակցային գործընթացում: Նախորդ տարվա ամռանը Կազանում Հայաստանի, Ադրբեջանի ու Ռուսաստանի նախագահների եռակողմ հանդիպման ձախողումը, ինչպես նաև ԵԱՀԿ Մինսկի խմբի համանախագահող Ռուսաստանում տեղի ունեցած ընտրությունները հանգեցրին բանակցային գործընթացի նիրհին:
Գործընթացին նոր ազդակ հաղորդելը կպահանջի որոշակի ժամանակ: Հենց նոր են տեղի ունեցել Ռուսաստանի ու Ֆրանսիայի ընտրությունները, ԱՄՆ-ում դրանք սպասվում են աշնանը, իսկ 2013 թվականին Հայաստանում ու Ադրբեջանում տեղի են ունենալու նախագահական ընտրություններ: Ես չեմ հավատում, որ բանակցային գործընթացում բեկում գրանցելը հնարավոր կլինի, նախքան գործընթացում ներգրաված բոլոր երկրների ընտրությունների ավարտը:
Ներկայիս դրությամբ՝ Հայաստանն ու Ադրբեջանը կարող են համաձայնության գալ միայն այնպիսի պարզ հարցերում, ինչպիսին է շփման գծում ուժեղացված դիտարկում անցկացնելը: Ակնհայտ է, որ անհրաժեշտ է ուժեղացնել դիտարկումը՝ հաշվի առնելով վերջին օրերին գրանցված միջադեպերը: Դրանց կանխման համար անհրաժեշտ է նվազագույնը վստահություն հաստատել հակամարտող կողմերի միջև:
Ղարաբաղյան հակամարտության գոտում իրավիճակը մնում է բավական լարված, հակամարտությունը սպառնում է թևակոխել վատթարագույն փուլ: Վերջին ամիսներին գնալով ավելի են հաճախակիանում բանակցային գործընթացում փակուղային իրավիճակի և ռազմական ճանապարհով հակամարտության կարգավորման հավանականության մասին լուրերը:
Սակայն եթե հակամարտող կողմերից մեկը որոշի դիմել խնդրի ուժային կարգավորման տարբերակին, ապա այդ պատերազմը կարող ձգձգվել երկար տարիներ: Դա չի լինի հնգօրյա պատերազմ, ինչպես Վրաստանում էր: Ավելին, այդ պատերազմը կարող է իրենում ներառել Ադրբեջանի, Հայաստանի մնացյալ տարածքը և անգամ Վրաստանը: Գործին կարող են միջամտել Թուրքիան ու Ռուսաստանը:
Վերջին երկու տարում ԱՄՆ պետքարտուղար Հիլարի Քլինթոնի երկրորդ այցը Հարավային Կովկասի երկրներ լավ նշան է: Քլինթոնը բոլոր երեք երկրներում՝ Հայաստանում, Վրաստանում ու Ադրբեջանում հայտարարեց Ղարաբաղյան հակամարտության ուժային կարգավորման անթույլատրելիության մասին, ինչպես նաև շփման գծում բախումների վերսկսման կապակցությամբ ԱՄՆ-ի անհանգստության մասին:
Դա լավ նշան է, որ ԱՄՆ-ը գիտակցում է, որ պատերազմը կարող է սկսվել տարածաշրջանում: Հուսով եմ, որ նա կանի այն, ինչ ասում է: Միակ խնդիրն այն է, որ, ամենայն հավանականությամբ, Հիլարի Քլինթոնը նոյեմբերին կլքի իր պոստը, ինչի համար էլ նրան քիչ ժամանակ է մնացել՝ անձամբ հակամարտության կարգավորման գործընթացում ներգրավվելու համար»:
