Грузия Online-ի փոխանցմամբ՝ պատգամավոր, «Վրացական խումբ» կուսակցության առաջնորդ Ջոնդի Բագատուրիան պահանջել է, որ խորհրդարանի նախագահ Դավիթ Բաքրաձեն հանրության առջև հրապարակավ ներողություն խնդրի ապրիլի 24-ին խորհրդարանում տեղի ունեցած միջադեպի համար:
Հիշեցնենք, որ այդ օրը Բագատուրիան առաջարկել էր քննարկել խորհրդարանի կողմից Հայոց ցեղասպանության ճանաչման հարցը: Սակայն դա հարուցել էր ադրբեջանական ծագում ունեցող պատգամավոր, խորհրդարանական մեծամասնության անդամ Ազար Սուլեյմանովի դժգոհությունը, ով Բագատուրիային «որպես վիրավորանք» անվանել էր հայ (Բագատուրյան): Ի պատասխան՝ Բագատուրիան նրա վրա էր նետել «Վազելինի» փաթեթը:
Բագատուրիան հայտարարել է, որ Սուլեյմանովի ու Ակակի Բոբոխիձեի մասնակցությամբ այդ խայտառակ միջադեպից անցել է ավելի քան 10 օր, սակայն խորհրդարանական մեծամասնության և ոչ մի ներկայացուցիչ ներողություն չի խնդրել հանրության առջև.
«Դա վիրավորական էր ոչ միայն հայերի համար, այլև առաջին հերթին այդպիսի անհարգալից ու կրիմինալ պահվածքը վիրավորանք է վրացիների հանդեպ: Եվ քանի որ այդ ամենը տեղի է ունեցել խորհրդարանում, ուստիև ավելի լավ կլինի, եթե այդ կապակցությամբ ներողություն խնդրի խորհրդարանի նախագահ Դավիթ Բաքրաձեն»:
Տեսանյութ http://www.youtube.com/watch?feature=player_embedded&v=2VE4jR4Cvlw#!