Մեկ տարի անց այն բանից հետո, ինչ ամերիկյան ուժերը որնչացրել են «Ալ-Քաիդայի» առաջնորդ Ուսամա բեն Լադենին, Իսլամաբադը այդպես էլ չկարողացավ պատասխանել ԱՄՆ գաղտնի ծառայությունների կտրուկ հարցերին` արդյոք Պակիստանի անվտանգության ուժերը չե՞ն պաշտպանել աշխարհի ամենաորոնվող ահաբեկչին: Այս մասին գրում է mignews.com-ը:
Ամերիկացիների իրականացրած գործողությունը մինչ օրս թունավորում է Վաշինգտոնի ու Իսլամաբադի հարաբերությունը, որտեղ ներկայում գերիշխում են հակաամերիկյան տրամադրությունները, զայրույթը` այդ գործողության ընթացքում երկրի ինքնիշխանությունը խախտելու համար:
Պակիստանի կառավարությունը նախապես ողջունել էր այդ գործողությունը, որի ժամանակ իր եռահարկ թաքստոցում սպանվել էր թիվ 1 ահաբեկիչը: Սակայն մի քանի ժամում տրամադրությունը փոխվել էր, երբ պարզ էր դարձել, որ պակիստանյան բանակին չեն զգուշացրել իրականացվելիք գործողության մասին:
Այն փաստը, որ Բեն Լադենը իր ընտանիքի հետ միասին ապրել է ռազմական «Վեյսթ Փոյնթ» ակադեմիայի պակիստանյան տարբերակի մոտ ու ոչ թե քարայրում կամ լեռներում, ինչպես ենթադրում էին շատերը, զարմանք ու տարակուսանք է առաջացրել Արևմուտքում. պակիստանյան բանակին մեղադրեցին երկկողմանի խաղ խաղալու մեջ
Աշխարհի թիվ 1 ահաբեկչին ոչնչացնելուց մեկ շաբաթ անց ԱՄՆ նախագահ Բարաք Օբաման հայտարարեց, որ Բեն Լադենը Պակիստանում «աջակցություն է ստացել», ու երկրի իշխանությունները պետք է պարզեն` ինչպես է նա երկար ժամանակ կարողացել թաքնվել: Ի պատասխան` Պակիստանը ձևավորեց հանձնաժողով` ուսումնասիրելու Բեն Լադենի ներկայությունը իր երկրի տարածքում: Անցած շաբաթ հանձնաժողովի մամուլի քարտուղար, պաշտոնաթող գնդապետ Մուհամմեդ Իրֆան Նազիրին հայտարարեց, որ հետաքննության արդյունքները պատրաստ են, սակայն դրանք հրապարակման ենթակա չեն:
Օբամայի ադմինիստրացիան էլ այն կարծիքին է, որ ոչ մի ապացույց, որը թույլ կտա ենթադրել, որ Բեն Լադենին Պակիստանում ցուցաբերվել է բարձր մակարդակով օգնություն՝ չկա, սակայն նրա «երկարատև ու հարմարավետ» ներկայությունը երկրում պակիստանյան հետախուզության ձախողումն է:
