Պաշտոնական Մոսկվայի դիրքորոշումը Ղարաբաղյան հակամարտության կարգավորման հարցում այս տարվա սկզբին Սոչիում կայացած Մեդվեդեւ-Ալիեւ հանդիպումից հետո փոխվել է, վստահ է ադրբեջանցի քաղաքագետ Մուբարիզ Ահմեդօղլուն` մեկնաբանելով Ռուսաստանի, Ադրբեջանի եւ Հայաստանի նախագահների` հոկտեմբերի 27-ին Աստրախանում ծրագրված հանդիպումը: «Նախեւառաջ` Ռուսաստանի դիրքորոշումը ղարաբաղյան հակամարտության կարգավորման հարցում կապված է հրետանային «Պիոն» զենքի վաճառքի հետ: «Պիոն»-ը, ի տարբերություն С-300-ի, հարձակողական զենք է, իսկ դա նշանակում է, որ եթե պատերազմ սկսվի, Ռուսաստանը կաջակցի Ադրբեջանի դիրքորոշմանը: Երկրորդը` օրերս Ռուսաստանի, Ֆրանսիայի նախագահների եւ Գերմանիայի կանցլերի հետ հանդիպմանը Մեդվեդեւը հայտարարել է, որ Մոսկվան կարող է լուծել սառեցված հակամարտությունները ԱՊՀ տարածքում»,- նկատել է ադրբեջանցի քաղաքագետը` ըստ Новости-Азербайджан-ի: Մ.Ահմեդօղլուի կարծիքով, Ռուսաստանի այս բոլոր փոփոխությունները բխում են Ադրբեջանի շահերից, եւ նա պատահական չի համարել, որ հերթական եռակողմ բանակցությունները տեղի են ունենալու Ռուսաստանի, Ֆրանսիայի նախագահների եւ Գերմանիայի կանցլերի հանդիպումից հետո: «Ղարաբաղյան կարգավորման հարցում Մեդվեդեւը վճռական դիրքորոշում ունի, եւ նա ձգտում է կարգավորել հակամարտությունը: Այդ իսկ պատճառով Աստրախանի հանդիպումից պետք է ակնկալել ավելին»:
