Նորվեգական «Կապելեն Դամ» հրատարակչությունը Ուտոյա կղզու սպանվածների հարազատների բողոքների պատճառով վաճառքից հետ է կանչել «Սիրտն ընդդեմ քարի» գիրքը, որի հեղինակը կղզում նորվեգացի ահաբեկիչ Անդերս Բրեյվիկի ահաբեկչությունից փրկվածներից մեկն է` Ադրիան Պրակոնը: Գիրքը լույս է տեսել Բրեյվիկի դեմ դատական գործընթացից առաջ: Այս մասին, ըստ RIA Novosti գործակալության, հայտնել է հրատարակչության ներկայացուցիչը:
22-ամյա Ադրիան Պրակոն կարողացել է ողջ մնալ 2011թ. հուլիսի 22-ին Ուտոյա կղզու ահաբեկչությունից հետո, որտեղ Բրեյվիկը սպանել էր 69 երիտասարդի: Նրա դրամատիկ պատմությունը լրատվամիջոցները բազմիցս ներկայացրել են. ողջ մնալու համար երիտասարդը ստիպված է եղել մահացած ձևանալ:
Ահաբեկիչը նրա վրա կրակել էր ևս մեկ անգամ, երբ տղան իր ընկերների կողքին պատկած է եղել գետնին, սակայն վրիպել է` դիպչելով նրա ուսին:
Գիրքը Ադրիանը գրել էր նորվեգացի լրագրող Էրիկ Մյոլլեր Սուլհեյմի հետ: Գրքում հավաքված են ողբերգության ականատեսների պատմությունները:
Գրքի կերպարների թվում է եղել 15-ամյա մի տղա` Էյվինդ անունով, որը սպանվել է ծնողների հետ հեռախոսազրույցից անմիջապես հետո: Տղայի ազգականները թույլ չէին տվել Պրակոնին օգտագործել հեռախոսազրույցից հատվածներ:
«Տղայի ազգականների ցանկության համաձայն`մենք հետ ենք կանչում գիրքը` շուրջ 1.5 հազար օրինակ»,- լրագրողների հետ հանդիպմանը տեղեկացրել է հրատարակչության ներկայացուցիչ Իդա Բրենսթենը:
Էյվինդի անունը գրքում հանդիպում է ավելի քան 20 անգամ, ու հեղինակը ներկայում պետք է նրա անունը հեռացնի գրքից, իսկ հրատարակիչները` այն նորից հրատարակեն:
Հիշեցնենք, որ 77 մարդու սպանության մեջ մեղադրվող Անդերս Բրեյվիկի դատավարությունը սկսվել է այս երկուշաբթի: 2011թ. հուլիսի 22-ին նա ահաբեկչություն էր իրականացրել Օսլոյի կառավարական թաղամասում, որից հետո կրակ էր բացել Ուտոյա կղզում երիտասարդական ճամբարի մասնակիցների վրա:
