Ռուսական Regnum լրատվական գործակալության փոխանցմամբ՝ Ադրբեջանը հրաժարվել է այս զբոսաշրջային սեզոնում ինքնահռչակ Հյուսիսային Կիպրոսի թուրքական հանրապետության (ՀԿԹՀ) հետ չարտերային թռիչքներ կազմակերպելուց: Այս մասին հայտարարել է ՀԿԹՀ-ի զբոսաշրջային ասոցիացիաների ղեկավար Օրհան Թոլունը:
Վերջինիս խոսքերով՝ Ադրբեջանն այդ քայլին գնացել է Հունաստանի և Կիպրոսի Հանրապետության գործադրած ճնշման հետևանքով. «2011 թվականի հոկտեմբերին Ադրբեջանը ՄԱԿ ԱԽ ժամանակավոր անդամ ընտրվելիս համաձայնել է Աթենքի ու Նիկոսիայի ներկայացրած նախապայմանին, ըստ որի՝ նա պետք է դադարեցնի ՀԿԹՀ-ի հետ ավիահաղորդակցությունը՝ ստանալու համար այդ երկու երկրների աջակցությունը ՄԱԿ ԱԽ-ի ընտրություններում:
Դրա համար էլ մեզ մոտ զգալիորեն նվազեց ադրբեջանցի զբոսաշրջիկների թիվը: Այսինքն՝ մենք ականատես եղանք, որ Նիկոսիան ու Աթենքը դիմել են շանտաժի: Սակայն մենք հավատում ենք, որ մեր ադրբեջանցի եղբայրները կվերսկսեն չարտերային թռիչքները դեպի ՀԿԹՀ»:
Հիշեցնենք, որ ներկայումս պաշտոնական Անկարան սպառնում է, որ եթե մինչև հուլիսի 1-ը՝ Կիպրոսի կողմից ԵՄ-ի նախագահության ստանձնումը, լուծում չստանա կիպրական հարցը, ապա ՀԿԹՀ-ն կվերանվանվի «Կիպրոսի թուրքական պետություն»:
