Հայտնի քաղաքական գորիչ, Սիրիայի ազգային խորհրդի (ՍԱԽ) անդամ Ռիյադ Թուրքը կոչ է արել ընդդիմության ղեկավարությանը ընդունել ՄԱԿ-ի և Արաբական պետությունների լիգայի հատուկ բանագնաց Քոֆի Անանի՝ ճգնաժամի կարգավորման ծրագիրը: Այս մասին հաղորդում է Elaph ինտերնետ պորտալը:
«Ընդդիմությունը, ընդունելով Անանի ծրագիրը, դրանով միջազգային հանրության վրա կդնի Սիրիայի քաղաքացիական բնակչության պաշտպանության, երկրում սպանությունների և բռնագաղթի դադարեցման պատասխանատվությունը»,- հայտարարել է 82-ամյա Թուրքը, որը հայտնի է «սիրիական Մանդելա» անվամբ և Հաֆեզ Ալ-Ասադի ու նրա որդու՝ Բաշարի կառավարման ընթացքում 417 տարի անցկացրել է բանտում:
Ռիյադ Թուրքը կարծում է, որ Քոֆի Անանի ծրագրի իրականացումը հնարավորություն կտա «իրական միջազգային վերահսկողություն սահմանել կրակը դադարեցնելու համաձայնագրին հետևելու և Ասադի վարչակարգի մանևրումներին վերջ դնելու համար»:
Սիրիացի ընդդիմադրի կարծիքով՝ արյունահեղության դադարեցումն իր հերթին թույլ կտա լուծել քաղաքական ճգնաժամը, ինչը կապված է առաջին հերթին նախագահ Ասադի հրաժարականի և բոլոր քաղաքական ուժերի մասնակցությամբ ազգային երկխոսություն անցկացնելու հետ:
ՍԱԽ ղեկավարությունը, որը միավորում է Սիրիայի ընդդիմադիր ուժերի մեծամասնությունը, մինչ այժմ չի հայտնել իր հստակ դիրքորոշումը Անանի ծրագրի վերաբերյալ: Սիրիայի իշխանություններն իրենց հերթին պաշտոնապես համաձայնություն են տվել Անանի ծրագրին:
Հիշեցնենք, որ Անանի ծրագրով առաջարկվում է և ընդդիմությանը, և իշխանություններին դադարեցնել կրակը, ինչպես նաև ապահովել մարդասիրական կազմակերպությունների և լրագրողների ազատ մուտքը երկիր:
