Ռուսաստանի վարչապետ Վլադիմիր Պուտինը ներկայացրել է Ռուսաստանի նախագահական ընտրությունների քարոզարշավի ֆինանսական հաշվետվությունը: Հաշվետվությունում տեղ գտած տվյալների մասին տեղեկություններ չկան, բայց 2012 թ. փետրվարի 24-ի տվյալներով՝ Պուտինի նախընտրական շտաբն ամենաշատ միջոցներն է ծախսել քարոզարշավի վրա. գրեթե 368,9 մլն ռուբլի:
Պուտինը բոլոր հինգ թեկնածուներից առաջինն է ներկայացրել հաշվետվությունը: Ըստ օրենքի՝ նրանք պետք է ներկայացնեին հաշվետվությունն ընտրությունների արդյունքների հրապարակումից 30 օր անց: Կենտրոնական ընտրական հանձնաժողովը պարտավոր է հինգ օրվա ընթացքում ուսումնասիրել դրանք:
Ինչ վերաբերում է մյուս թեկնածուների կատարած ծախսերին, ապա РИА Новости-ն հայտնում է, որ փետրվարի 24–ի դրությամբ երկրորդ տեղում է Միխայիլ Պրոխորովը` 319 մլն ռուբլի, ապա Գենադի Զյուգանովը` 251մլն ռուբլի, Վլադիմիր Ժիրինովսկին` 210 մլն ռուբլի, իսկ Սերգեյ Միրոնովը` 118,7 մլն ռուբլի:
Օրենքի համաձայն՝ թեկնածուի շտաբի ծախսերը չեն կարող անցնել 400 մլն ռուբլին, իսկ եթե միջոցներ ավելի շատ են հավաքվում, ապա ավելացող մասը մտնում է պետական բյուջե: Փետրվարի 24-ի դրությամբ միայն Պուտինի մոտ է եղել 400 միլիոնն անցնող գումար (411 մլն ռուբլի):
Ռուսաստանի Դաշնության նախագահական ընտրությունները կայացել են մարտի 4-ին: Վլադիմիր Պուտինը հավաքել է ձայների 63,6 %-ը: Նախագահի երդման արարողությունը նշանակված է մայիսի 7-ին:
