ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ ՀՀ Ազգային ժողովի նախագահ Սամվել Նիկոյանը մարտի 15-ին ընդունել է Հայաստանի Հանրապետությունում Կորեայի Հանրապետության նորանշանակ արտակարգ և լիազոր դեսպան Վի Սուն Լակին: Վերջինիս շնորհավորելով նոր պաշտոնը ստանձնելու կապակցությամբ` պարոն Նիկոյանն անդրադարձել է հայ-կորեական արդեն ձևավորված սերտ հարաբերություններին, կարևորել է երկկողմ կապերի հետագա ընդլայնումն ու զարգացումը:
ԱԺ նախագահը հատկապես առանձնացրել է միջխորհրդարանական առկա համագործակցությունն ու դրա խորացման անհրաժեշտությունը: Նրա խոսքով` խորհրդարանների միջև հարաբերությունները զգալի ներդրում կարող են ունենալ երկու երկրների ու ժողովուրդների փոխճանաչելիության մակարդակի բարձրացման, համագործակցության նոր ոլորտների բացահայտման գործում:
Խորհրդարանի ղեկավարը նշել է, որ հայկական կողմը բարձր է գնահատում Կորեայի Հանրապետության կառավարության կողմից իրականացվող օգնության ծրագրերը: Մասնավորապես, երկկողմ համագործակցության արդյունքում ամբողջովին վերազինվել է ՀՀ Ազգային ժողովի նիստերի դահլիճը և այժմ այն համապատասխանում է միջազգային ամենաբարձր չափանիշներին:
Պարոն Նիկոյանը կարևոր է համարել երկու երկրների միջև փոխայցերի ակտիվացումը, փորձի փոխանակումը, համագործակցությունը տարբեր` առևտրատնտեսական, գիտատեխնիկական, կրթության, մշակույթի և այլ ուղղություններով, ինչը հայ-կորեական հարաբերությունները զարգացնելու և ամրապնդելու կարևոր խթան կհանդիսանա:
ՀՀ-ում Կորեայի Հանրապետության արտակարգ և լիազոր դեսպանը, շնորհակալություն հայտնելով ընդունելության համար, նշել է, որ իր ջանքերն ուղղելու է երկու երկրների, մասնավորապես` խորհրդարանների միջև կապերի ու համագործակցության խորացմանը:
