Korrespondent-ի փոխանցմամբ՝ ամերիկյան Exxon Mobil նավթագազային ընկերությունը շահագրգռված է Թուրքիայում թերթաքարային գազի փնտրտուքով, որ պետք է արվի թուրքական TPAO պետական էներգետիկ ընկերության հետ համատեղ:
Այս մասին հայտարարել է TPAO-ի գլխավոր տնօրեն Մեհմեթ Ույսալը. «Մենք հետազոտություններ ենք անցկացրել և պարզել, որ Թուրքիան ունի թերթաքարային գազի արդյունահանման մեծ պոտենցիալ: Ներկայիս դրությամբ ամերիկյան ընկերությունը գնահատում է Թուրքիայի արևմուտքում ընկած Թրակիայում թերթաքարային գազի պոտենցիալը: Թերթաքարային գազի արդյունահանումը հեշտ չէ: Քիչ ընկերություններ են օժտված միաժամանակ բազմաթիվ հորատումներ իրականացնելու հնարավորությամբ»:
Նշվում է, որ ավելի վաղ Exxon Mobil ընկերությունն ԱՄՆ կառավարության պատվերով հետազոտություն է անցկացրել մի շարք երկրներում, այդ թվում՝ նաև Թուրքիայում և պարզել է, որ Թուրքիան ունի թերթաքարային գազի արդյունահանման մեծ պոտենցիալ:
Հիշեցնենք, որ թերթաքարային գազը պարունակվում է թերթաքարի շերտերում: Առաջին թերթաքարային գազահորն ԱՄՆ-ում հորատվել է դեռևս 1821 թվականին։ Թերթաքարային բնական գազն աննշան ծավալներով արդյունահանվում է արդեն մոտ 100 տարի։