Աշխարհում կատարվող ցանկացած գործընթացից, որ վերաբերում է Հայաստանին ու հայերին, բնականաբար սովորելու բան ունենք: «Առաջին լրատվական»-ի հետ զրույցում նման տեսակետ հայտնեց ՀՀԿ-ական պատգամավոր Արտակ Դավթյանը՝ պատասխանելով հարցին՝ պե՞տք է արդյոք դաս քաղել Ֆրանսիայի Սահմանադրական խորհրդի կողմից հայկական օրինագծի մերժման փաստից:
«Ամենևին չի նշանակում, որ մենք մեր երախտիքի խոսքը չպիտի արտահայտեինք ֆրանսիական Սենատում տեղի ունեցածի կապակցությամբ: Կարծում եմ, որ մեր գործողությունները համահունչ էին տեղի ունեցածին, և բնական է, որ եթե առաջիկայում մեր բարեկամները նմանատիպ գործընթացներ իրականացնեն, ապա մեր գործողությունները պետք է նորից համարժեք լինեն»,- ասաց պատգամավորը:
Հարցին՝ ժամանակից շո՞ւտ չոգևորվեց հայկական կողմը և դեռևս վերջնականորեն չհաստատված օրինագծի համար պետք եղածից վա՞ղ շնորհակալության տարափ չտեղաց Ֆրանսիայի նախագահի, Հայաստանում Ֆրանսիայի դեսպանի վրա, Արտակ Դավթյանը նկատեց. «Մեզ՝ հայերիս, հատուկ է ժամանակից շուտ ոգևորվելը: Դա մեր ինքնատիպության խիստ արտահայտված գծերից մեկն է: Բայց ես կարծում եմ՝ դրանով գեղեցիկ ենք ու տարբերվում ենք մնացածներից: Մեր հայտնած շնորհակալությունները տեղին են եղել»:
Ամփոփելով՝ հանրապետական գործիչը նշեց, որ հայկական դիվանագիտությունն առաջին հերթին աշխատանք պետք է տանի ֆրանսիական հասարակական կարծիքի ձևավորման ուղղությամբ: «Մեր աշխատանքները պետք է միտված լինեն հենց սրան: Յուրաքանչյուրս իր մասով պետք է նպաստ բերի այս գործին: Իսկ թե ի՞նչ կմտածենք պետականորեն, ավելի շատ պետք է դիտարկել ԱԳ և Սփյուռքի նախարարությունների մշակելիք ու իրականացնելիք քայլերի համապատկերում»,- ասաց Դավթյանը:
Հիշեցնենք, որ Ֆրանսիայի Սահմանադրական խորհուրդը երեկ՝ փետրվարի 28-ին, հակասահմանադրական է ճանաչել ցեղասպանությունների ժխտումը քրեականացնող օրինագիծը: Ֆրանսիայի Ազգային ժողովի պատգամավոր Վալերի Բուայեի ներկայացրած օրինագծին օրենսդիր մարմինը հավանություն էր տվել 2011 թ. դեկտեմբերի 22-ին, Սենատը` այս տարվա հունվարի 23-ին։ Ֆրանսիացի մի խումբ սենատորներ օրինագիծը վիճարկել էին Սահմանադրական խորհրդում:
