«Հավատում եմ քաղաքապետի խոսքին, որ կրպակները պուրակում ժամանակավոր բնույթ ունեն»,- «Առաջին լրատվական»-ի հետ զրույցում ասաց երգիչ Արամոն, որը Մաշտոցի պուրակի խնդրով անհանգստացած՝ պուրակում է: Նա տեղեկացրեց, որ առավոտյան քաղաքապետարանի դիմաց միացել է ակտիվիստներին և, անհանգսատացած լինելով Մաշտոցի պուրակում կրպակներ դնելու խնդրով, քանդակագործ Դավիթ Մինասյանի և ռեժիսոր Հրանտ Վարդանյանի հետ հանդիպել են քաղաքապետին:
«Քաղաքապետը մեզ ասաց, որ հենց այդ տեղում նախատեսվում է Հին Երևան նախագիծը, որը հրաշալի մի բան է: Քաղաքապետը մեզ հավաստիացրեց, որ պուրակում տեղադրվող էլիտար կրպակները բացառապես ժամանակավոր բնույթ ունեն: Ես հավատում եմ նրա խոսքին: Աբովյան փողոցից հանվեցին այդ կրպակները և այստեղ ժամանակավոր են տեղադրվում»,-մանրամասնեց հանդիպումը Արամոն` հավելելով, որ քաղաքապետի խոսքը արժանահավատ էր:
Լրագրողները զրուցեցին նաև քանադակագործ Դավիթ Մինասյանի և ռեժիսոր Հրանտ Վարդանյանի հետ, ովքեր նույնպես, մինչ քաղաքապետի հետ հանդիպումը, շատ դեմ էին պուրակում էլիտար կրպակների տեղադրմանը: Սակայն քաղաքապետի հետ հանդիպումը նրանց հույս է ներշնչում, որ կրպակները իսկապես ժամանակավոր են:
Մաշտոցի պուրակում ակտիվիստներին միացած մտավորականները այս պահին զբոսնում են պուրակով, իսկ Արամոն ծանաոթացավ էլիտար կրպակների տարածքին և տեսավ այն ծառերը, որոնց վնասել է բետոնը: Արամոն ասաց, թե տեղյակ չի եղել, որ կրպակների հարևանությամբ ծառերի արմատները վնասված են բետոնե հաստ շերտից, որը թափվել է էլիտար կրպակների շինարարության պատճառով:
Ակտիվիստները շարունակում են մնալ էլիտար կրպակի տարածքում տարածքում և հայրենասիրական երգերով բոլորին հրավիրում են պաշտպանելու իրենց «կանաչ» իրավունքը:
Լուսանկարը՝ Անի Սմբատյանի Facebook-ի էջից
