Փետրվարի 24-ին Թունիսում նախատեսվող «Սիրիայի բարեկամներ» միջազգային կոնֆերանսը, որին կմասնակցեն մոտ 100 երկիր և կազմակերպություն, հնարավոր է ճանաչի ընդդիմադիր Սիրիայի ազգային խորհուրդը (ՍԱԽ), գրում է Al-Sahrq Al-Awsat թերթը: Պարբերականի տեղեկություններով՝ կոնֆերանսում կքննարկվի ՍԱԽ-ի նկատմամբ միջազգային վերաբերմունքի հարցը:
Կոնֆերանսի կազմակերպիչները նաև հույս ունեն, որ Սիրիայի ճգնաժամի կարգավորմանն ուղղված հանդիպումը կստանա միջազգային հանրության, այդ թվում՝ ՄԱԿ-ի ԱԽ բանաձևն արգելափակած Ռուսաստանի և Չինաստանի ամենալայն աջակցությունը: «Մենք հույս ունենք, որ Ռուսաստանի դիրքորոշումը կփոխվի»,- հայտնել է թերթի աղբյուրը:
«Սիրիայի բարեկամներ» կոնֆերանս անցկացնելու նախաձեռնությունը պատկանում է Ֆրանսիայի նախագահ Նիկոլա Սարկոզիին, որը լայն աջակցություն է գտել մի շարք երկրների կողմից: Կոնֆերանսը ընդունելու պատրաստակամություն է հայտնել Թուրքիան, սակայն որոշում է կայացվել այն անցկացնել այն երկրում, որտեղ մեկնարկել է «արաբական գարունը»՝ Թունիսում:
Սիրիայում արդեն շուրջ մեկ տարի շարունակվող բախումների հետևանքով, ՄԱԿ-ի վերջին տվյալներով, զոհվել է 5400 խաղաղ բնակիչ և շուրջ 2000 զինծառայող ու ոստիկան: Որոշ տեղեկություններով՝ զոհված խաղաղ բնակիչների թիվը հասնում է 8000-ի:
