Հայաստանի արտգործնախարարի մամուլի խոսնակ Տիգրան Բալայանին «Առաջին լրատվական»-ը խնդրեց առանձնացնել 2010-ի արտաքին քաղաքական ոլորտի ամենակարևոր իրադարձությունները:
«Կարծում եմ՝ արտաքին քաղաքականության բնագավառում ամենակարևոր իրադարձություններն էին՝
– Մուսկոկայի հայտարարության, Ալմաթիի հայտարարության, Աստրախանի հռչակագրի և Աստանայի հնգակողմ հայտարարության ընդունումը: Բոլոր փաստաթղթերում ամրագրված դրույթները լիովին համահունչ են Հայաստանի դիրքորոշումներին և ի ցույց են դնում Հայաստանի կառուցողական և Ադրբեջանի ապակառուցողական դիրքորոշումը:
– ՀՀ նախագահի որոշումը հայ-թուրքական արձանագրությունների վավերացման գործընթացը կասեցնելու վերաբերյալ և այդ քայլի դրական ընկալումը միջազգային հանրության կողմից:
– Հայաստան-Եվրոպական Միություն ասոցիացման համաձայնագրի շուրջ բանակցությունների մեկնարկը:
– ՀՀ նախագահի այցերը ՄԱԿ-ի ԱԽ մշտական անդամների մայրաքաղաքներ, հանդիպումներն այդ երկրների ղեկավարների հետ:
– ՌԴ նախագահի պետական այցելությունը Հայաստան:
– ՀՀ և ԱՄՆ նախագահների հանդիպումը, ԱՄՆ պետքարտուղարի այցը Երևան»,- ասաց Տ.Բալայանը:
Հայաստանի ԱԳՆ մամլո խոսնակը նաև հավելեց. «Քանի որ մեր արտաքին քաղաքականությունը անմիջականորեն կապված է նաև տարածաշրջանի հետ, ապա, կարծում եմ, արձանագրությունների վավերացման գործընթացը կասեցնելու վերաբերյալ նախագահ Սարգսյանի որոշումը ոչ միայն տարածաշրջանային, այլև միջազգային խոշոր նշանակության իրադարձություն կարելի է համարել: Հայաստանի միջնորդությամբ ընթացած ռուս-վրացական բանակցությունների արդյունքում վերաբացվեց Վերին Լարս-Կազբեկի անցակետը: Ադրբեջանա-ղարաբաղյան շփման գծում Ադրբեջանի կողմից հաճախակիացած հրադադարի ռեժիմի խախտումները և դիվերսիոն գործողությունները մտահոգիչ են»:
Ի՞նչ կմաղթեք տարածաշրջանին 2011-ին` մեր հարցին ի պատասխան Տ.Բալայանն ասաց. «Մաղթանքները շատ պարզ են. ամենակարևորը՝ խաղաղություն և կապույտ երկինք: Մեր պետության համար հոբելյանի տարի է՝ 20-ամյակն է, և կմաղթեմ, որ հաջորդ տարի մեր պետությունը առավել զարգանա, ամրապնդի իր դիրքերը թե՛ տարածաշրջանում, թե՛ միջազգային ասպարեզում: Ամուր պետությունն է, որ կարող է պաշտպանել սեփական շահերը, կայացնել ինքնուրույն ու արժանապատիվ որոշումներ, բարձր պահել իր հեղինակությունը միջազգային ասպարեզում և ավելացնել իր բարեկամների թիվն աշխարհում»:
