Ռուսական ВЗГЛЯД թերթի փոխանցմամբ՝ ռուսական կողմը վրացական ընկերությունների փաստաթղթավորման ստուգման գործընթացն ավարտելու է հունվարի վերջին։ Վրացական այդ ընկերությունները պատրաստվում են վերսկսել իրենց արտադրանքը դեպի Ռուսաստան արտահանելու գործընթացը, որ ընդհատվել էր 2006 թվականին Ռուսաստանում դրանց ներկրման վրա դրված բեռնարգելքի պատճառով։
Վրաստանի արտահանողների ասոցիացիայի ղեկավար Վիկտոր Ցիլոսանին հայտարարել է, որ բյուրոկրատական քաշքշուկների բացակայության դեպքում գործընթացը կավարտվի մինչև փետրվարի 15-ը. «Բանակցություններում ներգրավված են մինչև 10 վրացական ընկերություններ, որոնց թվում է նաև «Բորժոմի»-ն, ինչպես նաև ալկոհոլ արտադրող ընկերություններ։ Վստահ եմ, որ սահմանի բացումից հետո կավելանա այն ընկերությունների քանակը, որոնք կցանկանան առևտուր անել Ռուսաստանի հետ»։
Հիշեցնենք, որ օրեր առաջ Ռուսաստանի գլխավոր սանիտար Գենադի Օնիշչենկոն հայտարարել էր, որ թերահավատորեն է մոտենում նրան, որ վրացական գինին ռուսական շուկա կվերադառնա արդեն փետրվար ամսին։ Օնիշչենկոն հավելել էր, որ Վրաստանի ղեկավարությունը պետք է կանգնեցնի իր հուշարձանը վրացական գինու որակը բարելավելու համար։
