Արաբական պետությունների լիգայի դիտորդների խմբի անդամներից Անվար Մալեքը, որը ԶԼՄ-ներում քննադատել էր իր գործընկերների գործունեությունը և Սիրիայի իշխանություններին մեղադրել բռնաճնշումների մեջ, ստիպված է եղել ժամանակից շուտ լքել Դամասկոսը «ոչ թե հիվանդության» պատճառով, ինչպես հաղորդվել էր ավելի վաղ, այլ իր կյանքին սպառնացող վտանգի պատճառով:
Al-Arabiya հեռուստաալիքին տված հարցազրույցի ժամանակ Մալեքը հայտարարել է, որ համացանցում սկսել է տարածել երկրում տիրող իրավիճակի և ԱՊԼ դիտորդների գործողությունների մասին իր նշումները՝ ավելացնելով, որ իրեն ավելի քան տասն անգամ զանգել են անհայտ անձինք և սպառնացել սպանել: «Հենց այդ սպառնալիքներն են իրական պատճառը, որ ես անհապաղ լքում եմ Սիրիան»,- ասել է նա:
ԱՊԼ-ն հինգշաբթի հերքել էր իր նախկին դիտորդի հնչեցրած հայտարարությունը Al-Jazzera հեռուստաալիքի եթերում, որտեղ նա հայտարարել էր, որ ԱՊԼ դիտորդների առաքելությունը «ապարդյուն է» և ի վիճակի չէ վերջ տալ երկրում բռնություններին: Նրա խոսքերով, հակամարտության գոտի եկած դիտորդները լիակատար ազատություն չունեն իրենց գործունեությունը ծավալելու համար:
«Այն բանից հետո, երբ նա կցվել է Հոմս քաղաքի դիտորդների խմբին, Մալեքը վեց օրվա ընթացքում չի հեռացել հյուրանոցից և այլ դիտորդների հետ դուրս չի եկել փողոց` պատճառաբանելով, թե հիվանդ է»,- ասվում է ԱՊԼ հայտարարության մեջ:
ԱՊԼ-ի տվյալների համաձայն՝ Մալեքը սկզբում խնդրել է իրեն թույլ տալ գնալ Փարիզ բուժվելու, այնուհետև անսպասելի, առանց որևէ մեկին տեղեկացնելու, լքել է առաքելությունը:
ԱՊԼ դիտորդների խմբում ներկայումս հաշվվում է 165 անվտանգության և մարդու իրավունքների հարցերով մասնագետ: Այն իր աշխատանքները սկսել է 2011 թվականի դեկտեմբերի 26-ին և արդեն այցելել է Սիրիայի մի շարք քաղաքներ, այդ թվում՝ Հոմս և Դարաա:
