ԿԳՆ-ի մշակած Կրթական համակարգում կոռուպցիոն երևույթների դեմ պայքարի 2011-2012թ.թ. համալիր գործողությունների ծրագրի համաձայն` արմատական փոփոխություններ են իրականացվելու ավարտական և միասնական քննությունների կազմակերպման գործընթացում: Նախատեսված է, որ յուրաքանչյուր առարկայի գծով 2012-ին արդեն կպատրաստվի և ԿԳՆ-ի կայքում կներդրվի 5000 առաջադրանք գրավոր քննությունների և 1000 առաջադրանք բանավոր քննությունների համար: Կրթության նախկին նախարար Էդուարդ Ղազարյանը մեզ հետ զրույցում կարծիք հայտնեց, որ այս բարեփոխմամբ ստեղծվում է հավասար պայմաններ բոլոր դիմորդների համար, և առաջադրանքների տարբերակները մեկ կամ մի քանի մարդու մենաշնորհ չի լինի, ինչն էլ էապես կնպաստի կոռուպցիոն ռիսկերի նվազեցմանը:
Նույն այդ ծրագրով մշակվել է դպրոցի տնօրենների ընտրության նոր համակարգ: Նախկինում դպրոցի տնօրեններին ընտրում էին դպրոցական խորհուրդները, իսկ խորհուրդներում էլ ներկայացված է այն օղակը, որը պատասխանատու է դպրոցի համար: Այսինքն` մեզանում կան դպրոցներ, որոնք ենթարկվում են նախարարությանը, որոշ դպրոցներ` քաղաքապետարաններին, որոշներն էլ մարզպետարաններին: Էդուարդ Ղազարյանի գնահատմամբ, վերջին 10 տարիներին տնօրենների ընտրությունները կուսակցականացվել էր, քանզի կախված նրանից, թե նախարարը կամ մարզպետը որ կուսակցությունն էր ներկայացնում, այդ կուսակցությունից էլ ընտրվում էին դպրոցների տնօրենները: «Այս նոր մշակված ծրագրով դպրոցի տնօրենի հավակնորդները պետք է նախ անցնեն պարտադիր վերապատրաստում, ստանան համապատասխան հավաստագիր: Վերապատրաստող կազմակերպություններին էլ լիցենզիա տալու է ԿԳ նախարարությունը, այսինքն` դա ինչ-որ կազմակերպության մենաշնորհը չի լինելու: Վերապատրաստումից հետո տնօրենների հավակնորդները նախարարության հատուկ հանձնաժողովի կողմից կանցնեն քննություն, և նրանք, ովքեր արժանի չեն, չեն կարող հաղթահարել խոչընդոտները դուրս կմնան պայքարից, անկախ իրենց կուսակցական պատկանելությունից»,- տեղեկացրեց պարոն Ղազարյանը` հույս հայտնելով, որ այս կերպ հնարավոր կլինի ինչ-որ կերպ պայքարել կրթական համակարգում արմատավորված կոռուպցիոն դրսևորումների դեմ:
