Rosbalt.ru-ի փոխանցմամբ՝ ԱՄՆ ղեկավարությունը վստահ է Սիրիայի նախագահ Բաշար Ալ-Ասադի անխուսափելի կործանմանը։ Բարաք Օբամայի վարչակազմում The New York Times-ի աղբյուրը հայտնել է, որ բոլորն արդեն իսկ համակերպվել են այն մտքի հետ, որ Ասադը, փաստորեն, գտնվում է անդունդի եզրին։ Անգամ հետախուզական ծառայություններն են վստահեցնում, որ նրան այլևս անհնար է վերադարձնել։
Սրա հետ կապված՝ ԱՄՆ-ը Թուրքիայի հետ սկսել է մշակել Սիրիայի նախագահի գահընկեցությունից հետո տարածաշրջանային ռազմավարությունը։ Այդ պլանի գլխավոր նպատակը պետք է լինի Սիրիայում սուննիների, ալավիների, քրդերի, քրիստոնյաների ու դրուզների միջև միջկրոնական քաղաքացիական պատերազմի կանխումը։
Դրա հետ մեկտեղ, ԱՄՆ-ը և Թուրքիան չեն ցանկանում ուղղակիորեն միջամտել սիրիական զարգացումներին, քանի որ դա ընդդիմությանն ավելի շատ վնաս կպատճառի, քան օգուտ։ Վաշինգտոնում վստահ են, որ ստեղծված պայմաններում Սիրիայում հնարավոր քաղաքացիական պատերազմը կարող է լրջորեն ապակայունացնել իրավիճակը հարևան երկրներում՝ Լիբանանում, Իսրայելում, Հորդանանում, Իրաքում և անգամ Թուրքիայում։
Ակնկալվում է, որ իրադարձությունների զարգացման նմանատիպ սցենարի կանխման ուղղությամբ կոնկրետ քայլեր ձեռնարկելու հարցն այս օրերին Նյու Յորքում ընթացող ՄԱԿ-ի Գլխավոր ասամբլեայի շրջանակներում քննարկելու են ԱՄՆ նախագահ Բարաք Օբաման և Թուրքիայի վարչապետ Ռեջեփ Թայիփ Էրդողանը։
Հիշեցնենք, որ երեկ ամերիկյան The New York Times թերթին տված հարցազրույցում Թուրքիայի արտգործնախարար Ահմեդ Դավութօղլուն Բաշար Ալ-Ասադին մեղադրել էր Թուրքիային կեղծ խոստումներ տալու մեջ.
«Թուրքիան բախվել է դավաճանության հետ և իրեն խաբված է զգում։ Ասադը կեղծ խոստումներ է տվել, նա չի պահել իր խոստումները»։
