Այսօր ֆրանսիական մամուլը գրել է, որ Ֆրանսիան Լիբիայի ապստամբների կառավարությունը ճանաչելու դիմաց ստացել է երկրի նավթային սեկտորի մոտ 35%-ը տնօրինելու իրավունք: Այս մասին հաղորդում է Reuters գործակալությունը:
Թերթերը գրում են, որ ապրիլի 3-ին Լիբիայի ապստամբների կողմից ձևավորված Ազգային անցումային խորհուրդը Կատարի շեյխին է հղել մի նամակ, որում հաղորդվում էր, որ Անցումային խորհուրդն ու Ֆրանսիայի իշխանությունները հասել են համաձայնության, որով Ֆրանսիան ստանում է Լիբիայի նավթային ոլորտի մոտ 35%-ը տնօրինելու իրավունք, ինչի դիմաց ֆրանսիացիները պարտավորվել են ամեն ինչ անել ապստամբներին լիակատար աջակցություն ցուցաբերելու համար (Կատարն այդ ժամանակ միջնորդի դեր էր ստաձնել Ազգային անցումային խորհրդի և Ֆրանսիայի իշխանությունների միջև):
Ֆրանսիայի արտաքին գործերի նախարար Ալեն Ժյուպեն այսօր ասել է, որ իրեն հայտնի չէ ոչ մի պայմանավորվածության մասին: «Ես ոչ մի բան չեմ լսել այդ նամակի մասին: Միակ բանը, որ ես գիտեմ, այն է, որ Ազգային անցումային խորհուրդը, խոսելով երկրի վերականգման մասին, մտադրություն ունի պայմանագրեր ստորագրել նախկինում իրենց աջակցած ուժերի հետ: Իմ կարծիքով, դա տրամաբանական է»,- ասել Ֆրանսիայի ԱԳ նախարարը:
