Այսօր տեղի ունեցած մամուլի ասուլիսի շրջանակներում ՀՀ Գյուղատնտեսության նախարարության գյուղատնտեսական ծրագրերի իրականացման գրասենյակի տնօրեն Գագիկ Խաչատրյանը ներկայացրեց Համաշխարհային բանկի հետ համատեղ իրականացվող «Գյուղացիական ռեսուրսների կառավարման և մրցունակության ծրագիրը»:
«Ծրագրի տևողությունը 5 տարի է, հիմնական ուղղվածությունը՝ գյուղական համայնքներում, որտեղ բնակչության հիմնական մասը զբաղված է անասնապահությամբ և այն հանդիսանում է ապրուստի հիմնական միջոցը, իրականացնել ծրագրեր, որոնք կնպաստեն անասնապահության արդյունավետության բարձրացմանը: Ծրագրի համար հիմք են հանդիսացել ուսումնասիրություններն այդ համայնքներում, և պարզվել է, որ գյուղական համայնքներում կան լուրջ ռեզերվներ, որոնք լիարժեք չեն օգտագործվում»,- նշել է Գ.Խաչատրյանը:
«Արոտավայրերը կազմում են ՀՀ տարածքի ավելի քան 1/3-ը և լիարժեք չեն օգտագործվում, իսկ դրանք անասնապահության համար մեծ ռեզերվներ են: Ծրագրի հիմնական նպատակն է արոտավայրերը դարձնել հասանելի բնակչության համար, ստեղծել անասնապահական մթերքի արտադրության և մթերման բարենպաստ պայմաններ, ապահովել կենդանիներին կերի անհրաժեշտ բազայով, որի արդյունքում կբարելավվեն տեղի բնակչության ֆինանսական միջոցները: Ծրագրի շրջանակներում ընտրվել է 55 համայնք ՀՀ 6 մարզերում, սրանք որոշակի չափորոշիչներով ընտրված համայնքներ են, որտեղ զարգացման լուրջ հեռանկարներ կան»:
«Նշված ծրագիրը, ի տարբերություն այլ ծրագրերի, ունի մի քանի նորամուծություն: Այսպես, այն իրականացվելու է համայնքներում ստեղծված կոոպերատիվների միջոցով, որոնք կոչվում են «Համայնքների արոտ օգտագործողների կոոպերատիվներ» և որոնք ստեղծվում են ՀՀ օրենսդրության շրջանակներում: Անհրաժեշտ է համախմբել համայնքները որոշակի խնդիրների շուրջ՝ արոտների արդյունավետ օգտագործում, կաթի մթերման խնդրի լուծում, ձմեռվա կերի կայուն բազայի ստեղծում»,- ասաց Գագիկ Խաչատրյանը:
Արդեն ստեղծվել են 18 կոոպերատիվներ, ընդ որում, ստեղծումը կամավոր սկզբունքով է, պարտադրանք չկա: Ենթադրվում է, որ պետք է ստեղծվեն 55 կոոպերատիվներ: Ծրագրի շրջանակներում ընդգրկվելու է ՀՀ արոտավայրերի 14%-ը՝ մոտ 146 հազար հա:
Նշենք, որ ծրագիրը ոչ միայն տնտեսական նշանակություն ունի, այլև լուրջ բնապահպանական:
