Ամերիկյան General Motors և հարավկորեական LG ընկերությունները համատեղ ստեղծելու են էլեկտրամեքենաներ: Այս մասին գրում է The Wall Street Journal-ը: Ըստթերթի` սա առաջին դեպքն է, երբ համագործակցում են ավտոարտադրողն ու էլեկտրոնիկա արտադրող ընկերությունները:
LG-ի բաժիններից մեկը` LG Chem-ը, ներկա պահին լիտիումային մարտկոցներ է մատակարարում GM ընկերությանը՝Chevrolet Volt և Opel Ampera հիբրիդային մեքենաների համար: Նոր համաձայնագիրը կմեծացնի նրանց համագործակցությունը: LG-ն կդառնա ավտոարտադրողի հիմնական մատակարարը: General Motors-ում կարծում են, որ համագործակցությունը կօգնի ընկերությանը՝ մեծացնել մրցակցությունը հիբրիդային ավտոմեքենաների ստեղծման ոլորտում, մասնավորապես՝ ԱՄՆ իշխանությունների վառելիքի ծախսերը կրճատելու հետ կապված պահանջների պայմաններում:
Այս ամսին ԱՄՆ իշխանությունները հայտարարել են վառելիքի ծախսի երկու անգամ կրճատման պահանջի մասին, որը, ինչպես կարծում են ավտոարտադրողներն ու մասնագետները, կբերի էլեկտրամեքենաների պահանջարկի աճին: Համաձայնության շրջանակներում LG-ն կարող է իր տեխնոլոգիական լուծումները վաճառել նաև այլ ընկերությունների, որը և կմեծացնի նրա ազդեցությունն այս շուկայում: