Ինչպես հայտնի է, Վենեսուելայի նախագահ Ուգո Չավեսն աշխարհում այն քիչ առաջնորդներից է, որն աջակցություն էր հայտնում Լիբիայի առաջնորդ Մուամար Քադաֆիին և մինչև հիմա էլ պատրաստակամ է ընդունել նրան Վենեսուելայի տարածքում: Երեկ Չավեսը հայտարարել է, որ Լիբիայի առաջնորդ Մուամար Քադաֆիի հեռացումը վերջ չի դնի ներլիբիական հակամարտությանը: Այս մասին հաղորդում է Associated Press գործակալությունը:
«Լիբիայի ողբերգությունը նոր է սկսվում»,- ասել է նա` հավելելով, որ ԱՄՆ-ն և Եվրոպան արժանի են դատապարտման այն բանի համար, որ ՆԱՏՕ-ի զորքերի օգնությամբ հարձակումներ են գործում Լիբիայի վրա և կործանում այն: Չավեսը լուրջ մտահոգություն է արտահայտել նաև Սիրիայի ռեժիմի ապագայի վերաբերյալ` հույս հայտնելով, որ Չինաստանն ու Ռուսաստանը, որպես ՄԱԿ ԱԽ-ում մշտական անդամներ, կխոչընդոտեն նման զարգացումներին:
Հակաչավեսյան տրամադրությունների հետևանքով երեկ հարձակում է տեղի ունեցել Տրիպոլիում Վենեսուելայի դեսպանատան վրա, որն ամբողջությամբ թալանվել է: «Մեր դեսպանատունն ամբողջությամբ թալանվել է հանցագործների կողմից, որոնք ոչ մի կապ չունեն միջազգային իրավունքի հետ», ասել է Վենեսուելայի նախագահը:
