Հայ-ֆրանսիական ապակենտրոնացված համագործակցության համաժողովի նախապատրաստական հանդիպումն անցկացվել է Երեւանում, առցանց ձևաչափով՝ Ֆրանսիայի եւ Հայաստանի մի շարք համայնքների ներկայացուցիչների համար:
Ինչպես տեղեկացրին Սեւանի համայքնապետարանի աշխատակազմից, հանդիպմանը մասնակցել են Հայաստանում Ֆրանսիայի դեսպան Անն Լույոն, Տարածքային կառավարման եւ ենթակառուցվածքների նախարարի տեղակալ Վաչե Տերտերյանը, Հայաստանի համայնքների միության նախագահ Էմին Երիցյանը, «Ֆրանսիայի միավորված քաղաքներ» կազմակերպության «Հայաստան» խմբի նախագահ, Լիոնի փոխքաղաքապետ Սոնիա Զդորովցովան, Հայաստանի համայնքների, «Ֆրանսիայի միավորված քաղաքներ» կազմակերպության ներկայացուցիչներ: Հանդիպման նպատակն էր՝ քննարկել հունիսին անցկացվելիք Հայ-ֆրանսիական ապակենտրոնացված համագործակցության 4-րդ համաժողովի կազմակերպչական եւ թեմատիկ հարցեր:
Հայաստանում Ֆրանսիայի դեսպան Անն Լույոն, կարեւորելով հայ-ֆրանսիական ապակենտրոնացված համագործակցությունը, նշել է. «Միասին պետք է խոսենք այն տարբերակների եւ առանձնահատկությունների մասին, որոնք կարող են կիրառվել հայ-ֆրանսիական հարաբերությունների ավելի ակտիվացման համար:
Մենք պետք է համահունչ լինենք իրականությանը, կարողանանք փոփոխվել ու հարմարվել միջազգային եւ տեղական համատեքստին»:
«Ֆրանսիայի միավորված քաղաքներ» կազմակերպության «Հայաստան» խմբի նախագահ, Լիոնի փոխքաղաքապետ Սոնիա Զդորովցովան հույս է հայտնել, որ Լիոնում կկարողանան կազմակերպել բավականին մեծածավալ հանդիպումներ։ 4-րդ համաժողովի նախապատարաստական հանդիպմանը Սեւան համայնքից մասնակցել է համայնքապետարանի աշխատակազմի զարգացման ծրագրերի, տուրիզմի բաժնի պետի պաշտոնակատար Դավիթ Թորոսյանը։
