Կիպրոսի Հանրապետության նախագահ Նիկոս Անաստասիադիսի գրասենյակը հայտնել է, որ ՌԴ նախագահ Վալդիմիր Պուտինից ստացել է պատասխան նամակ այն ուղերձին, որը Կիպրոսի ղեկավարն ուղարկել էր իր ռուս գործընկերոջը Կիպրոսի հյուսիսում գտնվող Վարոշա թաղամասի շուրջ ստեղծված իրավիճակի առնչությամբ: Այս մասին հաղորդում է ТАСС գործակալությունը:
«Մենք անթույլատրելի ենք համարում միակողմանի գործողությունները, որոնք խախտում են ՄԱԿ-ի Անվտանգության խորհրդի 550 և 789 բանաձևերը», – մեջբերում է գրասենյակը Պուտինի նամակից:
Ըստ Կիրպոսի նախագահի գրասենյակի՝ Պուտինը նամակում նշել է, որ ուշադիր կարդացել է մայիսի 14-ին իրեն ուղարկված նամակը, ինչպես նաև հուլիսի 5-ին ուղարկված հաղորդագրությունը: Դրանցում կիպրական կողմը մտահոգություն էր հայտնում Վարոշայի ստատուս քվոյի հնարավոր փոփոխության առնչությամբ:
Կրեմլի մամուլի ծառայությունը երկրի ղեկավարի նամակի մասին չի հաղորդել:
Ավելի վաղ ինքնանռչակ Հյուսիսային Կիպրոսի Թուրքական Հանրապետության ղեկավար Էրսին Թաթարը Նիկոսիայի թուրքական հատվածում տեղի ունեցած զինվորական շքերթի ժամանակ հայտարարել էր, որ Վարոշայի այն հատվածը, որը գտնվում է կղզու չեզոք գոտում, կապառազմականացվի և կհանձնվի կիպրոսցի հույն սեփականատերերի օգտագործմանը: Շքերթին ներկա Թուրքիայի նախագահ Էրդողանը ողջունել էր այս որոշումը: Սակայն ՄԱԿ-ի Անվստանգության խորհրդի՝ 1984 թ.-ի բանաձևի համաձայն՝ Վարոշա ոչ ոք չպետք է մուտք գործի, մինչև այնտեղ չվերադառնան 1974 թ.-ին արտաքսված կիպրոսցի հույների սերունդները:
Ըստ ՄԱԿ-ի ԱԽ մեկ այլ բանաձևի՝ շրջանը պետք է վերադառնա ՄԱԿ-ի խաղաղապահների վերահսկողության տակ:
Չնայած այս երկու փաստաթղթերին՝ Հյուսիսային Կիպրոսի Թուրքական Հանրապետության իշխանություններն անցյալ տարվա հոկտեմբերին Վարոշայի հյուսիսային թաղամասերի ծովափնյա հատվածը բացել են զբոսաշրջիկների առջև:
