Վարչապետի պաշտոնակատար Նիկոլ Փաշինյանն երեկ գլխավոր դատախազությունում անդրադարձել է ապօրինի ծագում ունեցող գույքի բռնագանձման ինստիտուտի ներդրմանը՝ նշելով, որ այն նոր սկսել է գործել: «Այստեղ է, որ մենք պիտի կարողանանք արդարության ճանապարհներով քայլել, որպեսզի, այսպես ասած, վրեժխնդրության տրամաբանություն չգործի, այլ գործի օրինականության տրամաբանություն և ի վերջո արդարությունը հաստատվի»,-ասել է նա հավելելով, որ այս բոլոր գործառույթներում դատախազության դերն առանցքային է: Այս թեմայի շուրջ «Առաջին լրատվական»-ը զրուցել է «Հելսինկյան ասոցիացիա» իրավապաշտպան ՀԿ նախագահ Նինա Կարապետյանցի հետ, ով այնքան է վստահ չէ, որ իշխանություններն այդ գործընթացում կհաջողեն:
«Նիկոլ Փաշինյանն ու իր թիմը դեռևս 3 տարի առաջ ոչ թե պետք է շնորհավորեին ու հույսեր կապեին դատախազության հետ, այլ թիվ մեկ քայլը պետք է լիներ հարց ուղղելը: իսկ հարցը հետևյալն է. ի՞նչն է եղել պատճառը, որ տոտալ կոռուպցիա է եղել տարածված, չի եղել համակարգ, որը կոռուպցիայի մեջ թաթախված չլինի, ու այդ ամենը դատախազությունը չի տեսել, միջոցներ չի ձեռնարկել: Արդյոք այդ դատախազությունը չի հովանավորել այդ բոլոր կոռուպցիոն սխեմաները: Թիվ մեկ հարցը սա պետք է լիներ: Թե չէ հիմա ասել՝ մենք ստացել ենք մանդատներ, ինչ-որ դիկտատուրա ենք հաստատելու: Այդ դիկտատուրան դատախազությունը շատ վաղուց էր հաստատել և հաստատել էր շարքային քաղաքացիների նկատմամբ: Հետևաբար, իրենք շատ լավ գիտեն՝ ինչ է նշանակում դիկտատուրա, հիմա ժամանակն էր եկել այդ դիկտատուրայից ձերբազատվելու, ոչ թե նոր դիկտատուրայի մասին խոսելու:
Ոչ մի սպասում չունեմ այդ չբարեփոխված, չզտված, չմաքրված, նախկինում տարբեր գործեր կոծկած համակարգերին պատասխանատվության չենթարկած համակարգով որևէ փոփոխության հասնելու»,-ասաց նա:
Դիտարկմանը, որ ապօրինի գույքի բռնագանձման հետ կապված 400-ից ավելի գործեր են ուսումնասիրվում, Նինա Կարապետյանցն ասաց. «Մի հին անեկդոտ կար, ասում է՝ դու էլ ասա: Հիմա ամեն անգամ երբ այդպիսի հայտարարություն են անում, ես այդ անեկդոտի նման ասում եմ՝ դուք էլ ասեք: Ես անհամբեր կսպասեմ դրա արդյունքներին: Իրականում քննադատությամբ հանդերձ, չհավատալով հանդերձ, ես իրենց հաջողություն եմ մաղթում: Եթե իսկապես ցանկություն ունեն փոփոխությունների, թող հասնեն դրանց, պարզապես ես չեմ հավատում, որ փոփոխություններ կլինեն, որովհետև վերջին երեք տարիները հուշում են, որ որևէ քայլ չարվեց:
Ի դեպ ուզում եմ հիշեցնել, որ 2018-ին ստացած իրենց մանդատը ոչ պակաս կարծր էր, քան հիմա ունեն: Այն շատ ավելի հզոր էր, շատ ավելի կարծր էր և շատ ավելի մեծ հնարավորություններ էր տալիս, քան այս մեկը: Ուղղակի ոչ թե չհասկացան, այլ կարծում եմ՝ դա նաև պայմանավորվածության արդյունք էր, որ համակարգերը չբարեփոխվեն, որպեսզի հանցավոր ռեժիմի վերադարձի հնարավորություն ստեղծվի:
Ամեն դեպքում իրենց հաջողություն»:
Ինչ վերաբերում է նրան, որ իշխանությունն ասում է, որ իրենք շանս էին տվել, որ մարդիկ վերափոխվեն, իրավապաշտպանն արձագանքեց. «Իրենք իրականում ժամանակ էին տվել հանցագործ ռեժիմին վերադասավորելու իրենց ուժերը, և ինչպես ես կանխատեսում էի, որ հանցավոր ռեժիմի վերադարձ է լինելու, հիմա այդ չբարեփոխումները, խնդիրները ժամանակին չլուծելը բերել են նրան, որ հանցավոր ռեժիմի կարկառուն դեմքերը հայտնվել են արդեն ԱԺ-ում և իրենք այսօր մասնակի վերադարձել են իշխանության: Ու դա այն պայմաններում, երբ ժողովուրդը նրանց հիմնահատակ մերժել էր»:
Նա անդրադարձավ նաև նրան, որ ՀՀ նախկին ոստիկանապետ Վովա Գասպարյանի գույքի վրա կալանք է դրվել հենց ապօրինի գույքի բռնագհանձման օրենքի հիման վրա. «Կարող է ձևական առումով 1-2 գործով դատարանի որոշումներ լինեն, բայց քանի որ խնդիրը համակարգային է եղել, մեծ ծավալի է եղել, Վովա Գասպարյանն այս ամբողջ պատմության մեջ չէի ասի, որ մեծ կերպարներից մեկն է: Մենք հաջողության կարող ենք հասնել, երբ որ կունենանք արդեն ռելսերի վրա դրված վիճակ»:
